Zərdab rayoni heyvandaron bekəfşən mandən.

Çe Zərdab rayoni divojə əhali əsasə məşğuliyyət heyvandarətiey. Əvon de ım roy ıştə əmrəməli bə səhmon dəğandedən, ıştə xeyzoni vi-vay dodən.

Alcanlı diy sakinon bə Respublika muxtəlif ali təşkilaton şikat kardedən ki, çəvon kəfşəni zəminon bə kənoə odəmon həvatəşone, ısət əvon ıştə heyvonon çovnie, bo əvon zomsoni yomyə tədaruk karde imkaniku məhrumin və ıştə heyvonon bə erjonə ğıymət həvate məcburiyyətədə mandən. Ğədir Xəlilov bə Meydan TV ıştə problemon həxədə votəşe ki, 1996-minə sori zəminon bə diy sakinon baxş kardeədə, har ailə baxşə zəmini i ğism bo heyvonon çovnie ro bənə kəvşəni ço kardışone. Çəyo həmonə zəminon 5-6 nəfəri ğəsb kardışe. Çəvonədə qıley,  çe Kəlbəcəriku kuçkardə sakini 30 hektar bəştə nom ovoştıniəşe. Isət həmonə kəvşənon bəvon məxsuse, co kəson heyvonon əyo çardeədə , əvon həmonə mol soybi bə məhkəmə dodən. Hakimən əvoni yolə məbləğədə cərimə kardedə. Tosə ısət diy sakinonədə bə 11 nəfəri umumən 40 həzo mənot cərimə bıriəşone. Xəlilov həmən votedə ki, 3 qılə hırdən hestışe, de heyvon oqəte roj ıştə xeyzoni firəvonəti təmin kardedəbe. Bənə bey çey həmdivojonən çe kəfşənə zəminonku məhrum be səbəbiku çəvon quzəron vey qıvonin bə.

Alıcanlı diy bələdiyyədə bə muxbiri votəşone ki, həmonə zəminon bə icarə doə bıə. Kənoə odəmon bə zəminonədə ıştə molon çovnie ixtiyarşon ni.

Rayoni Şahhuseynli və Çallı dionədədn vəziyyət ım cürey. Şahhusynıvojon votedən ki, vəzifədaron çəvon 700 hektar kəfşəni zəminon bə kənoə odəmon həvatəşone. Çallı diy əjiyon bə jıqo vəziyyəti etiraz kardışone , fevralə manqədə hətto maqistralə şosse ro dəbasışone. Bəvədə rayoni icra hakimiyyəti sərdar bə etirazkaron sıxan doşe ki, ım problemi nezə vaxtədə həll bəkarde. Dəvardə rujonədə Çallivojon bə Meydan TV zanq jəşone, məlumat doəşone ki, çə rujiku 3 manqisən vey vaxt dəvardə, icra sərdari tosə ısət bı mışıli əncom kəşe ro hiç qıley tədbir vindəş ni.