Boku Yasamal rayonədə polison hoziəti.

De koronavirusi mubarizə Operativə Ğərorqohi elan kardəşbe ki, iyunə manqi 7 və 8 minə rujon Boku, Sumğait, Qəncə, Lankon şəhəron və Abşeron rayoni əhali kəyku bə kəno benışo.

Boku Yasamal rayoni Bunyadzodə kuçədə mayə manqi 7-ədə  qıley insident vağeə bıe. Həmonə kuçə qıley jimonə bina soədə  polison i kəsi dastqir karde bə sakinon etirazi səbəb bıe, əvon çe petonə mərətbonədə bə çəvon sə xəşəl ekardıone. Çimiən nəticə əv bıe ki, çey maşkinə ruji maştəvoy bə həmonə so 200 nəfəro ibarət rə bə əncom rəsə polki polison varid bın və bə şəhrıvandon mənzilon de zori daxil bin, 11 nəfər odəm çe lefo bekardışone, de jinə oləti, pobənəso bə maşin eqətınone bardışone bə polisxonə. Bəvon 5 saati muddətədə fiziki cəzo tətbiğ kardəşone, əvonşon kue, çəyo de məhkəmə ğərori 10 sutkəku tosə 30 sutkə bə inzibatiə zindonə cəzo məhkum kardəşone. Bə həmonə odəmonədə qıley Kərim Suleymanovi  vəkil Cavad Cavadovi Vəkilon Kolleqiya çəşnavi doşe, bə qorə ki, ey polisxonədə bə Suleymanovi işqəncə doe fakt bə cəmiyyəti rosniəşe. Yasamal rayoni polis şebə rəhbəriyyəti isə ım fakt təkzib kardəşe, çey sıvvətədə pandom və pıxəyon de quya Suleymanovi dastqir kardeədə bə polison  şiddətinə muğavimət nişon doe səbəbiku bə əməl ome izah kardəşe .

Isət Bokuədə polisi ım nubətinə həvəşiə hərəkət nəinki keşvəri, hətto Avropa ictimai daironədə bə muzakirə mevzu peqardə. Çe AŞPA bə Azərbaycani dair həmməruzəkar Stefan Şennak polison de odəmon ım curə rəftor ğeyri-insoni və dəhşətinə hadisə hisob kardəşe. Almaniyadə azərbaycanıjə muhaciron çe Kansler Merkeli iqamətqahi vədə etirazə aksiya dəvuniəşone, Daxili Koon Vəzir Vilayət Eyvazovi muhakimə tələb kardəşone, Almaniya hokumətikuən piəşone ki, de diktatorə rejimon ıştə munasibəti əvəz bıkardo.

  Milli Məclisi deputatonədə Əli Huseynli , Fazil Mıstəfo isə bə polison ım hərəkəti tərəfdar beşən və əv ğanuni hisob kardəşone.