Dağıstoni marzədə azərbaycanıjon vəziyyət qıvonine.
Dağıstonədə Rusiya de Az.R marzədə azərbaycani şəhrıvandon, ki bə vətən oqardə pidəşone, vəziyyət xeyli qıvonin bıə. Hələ əvon dəvardə manqi orəxədə bə Rusiya Prezident Putini muraciət kardışone ki, bəvon bə vətən oqarde komək bıkardo.
Putiniən cəvon xahiş məseşe, bə Əliyevi zanq kardışe ki, bəştə şəhrıvandon soyb beşo. Çə vaxtiku sərhədədə dəpuşiə odəmon i ğism bə vətən vadoşone. Əmo ım problem hələn həll bıə ni, bə səbəb ki, çe Rusiyaku bə vətən oqarde piə odəmon miğdar orəxedəni, rujbəruj odəmon omedən bə marzi dıço bedən, etiraz kardedən, çəvon vay-şivənon bəpeş Boku hokumət çəvonku bə 200-250 nəfəri marzi ovaşte icazə dodə.
Etibarinə mənbəon bəmə doə məlumati istinadən “Bemarzə pezeşkon” beynəlxalğə təşkilati həmkaron Kullar duşərqohədə bən, əyo dəpişiə odəmon şikaton məsəşone, çəvon maddi və məişətə vəziyyətiku xeyli norohət bıən. Məlum bıə ki, bə vətən ovaşte ro bə Azərbaycani tərəfo omə məmuri 400 dollar rışvə doe lozime. Əvon həmən de Azərbaycani tərəfi marzəvonon təmas onoe piəşone, əmo marzəvonon çimiku imtino kardəşone. Çəyo de Az.R Moskva səfarəti rabitə onoəşone, çəvrey mətbuatə xidməti votəşe ki, səfarəti de ım problemi məşğul bıe səlahiyyət nişe. Bemarzə pezeşkon Boku hokuməti bəştə əhali tale bı ğədər biqonə mandeku xeyli təəccub kardəşone.
İyuni 15-də həmonə duşərqahədə azərbayçanıjon de Rusiya muhafizə orğani həmkaron arədə insident bə əməl ome. Çimi səbəb jiqo bıə: həmonə ruj xəbə beşə ki, manqi 16-ədə 240 nəfər bə Azərbaycan obəvoştınen. Im bə duşərqohi odəmon aid nibəbe. Imi məsəcəğin odəmon bə hiddət omən , beşən maqistral şosse ro pebıriəşone. Bə Rusiya “İnterfax” İnformasiya Aqentiyyəti xəbə əsasən Federalə Əmniyyətə Xidməti və Daxili Koon Vəzarəti həmkaron bə hadisə vırə omən, əmo etirazəkon bəvon muğavimət nişon doəşone. Çəyo Xususi Təyinatinə Polisə Ğıvvon çəvonədə tosə 90 nəfər dastqir kardəşone, bı əməliyyatədə 6 nəfəri xəsarət səşe. Həmonə 6 nəfər ısət mərizxonədə mualicə bedə, dastqirbəkəson isə bə polisxonə bardəşone, protokol tərtib bıə bəpeş sərbəst vadoəşone.
