Bokuədə peşomə ov ğət bıə.

Tovıstoni boxorə rujon bino bıe, Boku xeyli məntəğəonədə peşomə ovi problem bə əməl vardəşe. Bə Xətai , Binəğədi, Suraxani, Sabunçı, Xırdalan, Saray ğəsəbon ovi de fasiləon dodən. Suraxani rayoni Bahar ğəsəbə və Binəqədi sakinon hətto maqistralə şosse roy dəbaste məcburiyyətədə mandən.

Maide.az bə Meydan TV istinadən xəbə dodə ki, sakinon bə ım hərəkəti vadar karde səbəb əve ki, 1 həftəsə veye bə çəvon ğəsəbəon ov omedəni. Əlağədar təşkilatonən çəvon şikati məsedənin, bə ım mışğıli əncom kəşedənin.

De ım məsələ əlağədar “Azərsu” Ojə Səhmdarə Cəmiyyəti mətbuatə mərkəzi sərdar Anar Cəbrayıllı məlumat doəşe ki, həvosati qam bıe ovi istehlak xeyli vey kardəşe. Haliyədə iqlə Boku mərkəzi məhəllonədə ovi təchizat normale, əmandəynə kavartalon, məxsusən Abşeroni dionədə vəziyyət qıvonin bıə. Bə səbəbən ovi de fasiləon nəğl karde zərurət bə əməl omə. De karantinə rejimi əlağədar əhali kədə mande, həmən villa soybon ıştə hovuzon de ovi pur karde ovi istehlaki ziyod be əsasə səbəbonədəy.

Ovi təchizat respublika rayononədən kritik vəziyyətədəy. Çe Qeranboy Beru diədə məskun bıə Xocali kuçkardon bə rayoni İcra Hakimiyyəti bina şemon təşkil kardəşone, bə səbəb ki, peşomə ovi bə məmuron villa və istirahətə mərkəzon dodən, əmo 2 manqe ki, beovəti əvonış bə zinhor vardə.

Çe Bərdə rayoni Mustafaağalı diy əjionən ıştə pambə hion de ovi təminatiku qırey kardedən. Fermer Ərəstun Cavadovi bo “Sputnik Azərbaycani” muxbiri qəp jəşe ki, ey 50 hektar panbə kaştəşe, əmo bey ov rosnie zınedəni. Çey divojon umumən 700 hektarədə pambə kaştəşone, əvonən ovi tərəfo korıği kəşedən.

Mutəxəssison məmləkətədə ovi problemi ım ğədər şiddətin bıe səbəbi bımədə vindedən ki, hokuməti bə ekoloji problemon həll karde ro kifayət ğədər səy nişon doəş ni. Melorasiya sahədə hiç qıley nuə texnoloqiya tətbiğ nıbe və ovi de kanə vasitəon nəğl karde bə çey xeyli miğdarədə qin be səbəb bedə. Qurciston və Dağıstoni tərəfədə ruon vədə bəndon inşa bıe bə məmləkət omə ovon miğdari kam kardəşe , və keşvərədə ım mışğıli həniən qıvonin kardə səbəbonədəy.