Çe Az.R polisi ıştənbəsə hərəkəton dəvom kardedə.

Az.R Mass-mediadə çe Respubluika polison bə əhali qətə divonon, çəvon huğuğon darıştə, hətto çinayətkaron mudafiə kardə fakton barədə xəbəon daima pevolo bedən. Təəccubinə ko ıme ki, devləti tojə təyin bıə ali məğaminə vəzifədaron – Sər prokuror, Daxili Koon vəzir, Devlətə Əmniyyətə Xidməti sədrən bə polison ım curə hərəkəton əncom kəşedənin.

“Mısılmonon İbemonə Hərəkati” uzv Alik Aslanov ıştə “Fasebook” səhifədə nıvıştəşbe ki, bə şiddətiə karantinə rejimi, həmən bə polison bə xalqi divon qəte etiraz kardedə. Bə ım fikri qorə polison əvşon dastqir karde, İmişli rayoni məhkəmən bo ey 15 sutkəninə inzibatiə zindonə cəzo bırişe.

Quba şəhrestoni sakin Rəşid Məmmədov rayoni polison bə çey sə vardə hənqoməon barədə bə Meydan TV şikat kardəşe. Votəşe ki, rayonədə narkotik həvatə fakton və  Quba polison de narkotrafiki mubarizə nıbarde barədə bə Respublika mufafiğ orğanon məlumaton vığandəşbe. Bı səbəbən ısət rayoni polis şebə rəhbəriyyət bey tars omedə, hətto əv bə 10 sutka muddəti bə zindonən dənoəşe ki,  həni narkotikə ticarəti barədə bə penə instansion şikayət nıvğando.

Binəqədi polison reper və ictimai fəal Elşən Teymurov dastqir kardəşone, de narkotikə ittihami boəyo 2 manqnə dustəğə cəzo bıriəşone. Çey pıə Qəşəm Teymurov bə Amerika Sədo radio şikat kardəşe, votəşe ki, polison qıley şəhidi ailə uzv kuəşonbe, Elşəni ım fakt de sosialə şəbəkə vasitə bə cəmiyyəti rosnişe. Bı səbəb bə çey sə jıqo ədovət vardedən. Ey həmən votəşe ki, Elşən çe ailə yekanə nun ğəzənc kardəkəse. Isət çəvon xeyzoni anədə imkan nişe ki, boəyo qıley vəkil bıqəto, çey huğuğon mudafiə karde bızıno. Daxili Koon Vəzarəti rəsmiyon de ım fakti əlağədar hiç qıley məlumat pevolo kardəşon ni.

 Mİnqəçevirədə içtimai fəal və bloqer Elçin Həsənzadə şəhəri rəhbər vəzifəninə odəmon tənğid karde səbəbiku de bıhtonə maddə haliyədə şəhəri məhkəmədə muhakimə bedə. Bı barədə şəhəri rəhbəriyyəti bə “Turan” İnformasiya Aqentiyyəti məlumat doeku imtina kardəşe.