Az.R-ədə ov boçi ğıt bıə
Dınyoədə peşonə ovi ğıtiəti zumand bedə. İğlimşunason proqnoz dodən ki, peşnə 30 sorədə ım problem həniən şiddətin bəbe, hətto devləton arədə bə canqon səbəb bıe bəzıne.
Tovıstoni hışkə həvosati bino bıe Az.R əraziədə ovi ğıtiəti həniən qıvonin kardəşe. Im məsələ parlamenti Təbii ehtiyaton və ekoloqiya komitədə muzakirə kardəşone. “Azərsu” Ojə Səhmdarə Cəmiyyəti sədrən bə həmonə işlas dəvət bıə, məmləkətədə ovi problemi həll karde imkanon ovıjqıniəşone. “Tolishmedia.com” sayt Səlyon və Hatəçolə məntəğəonədə Kuri ovi tosə ısət bə huç vaxt nıbə səviyyə eqınie səbəbiku Kasipi dıyo suə ovi 25-30 kilometr əraziədə bə ruy məcra daxil beku nıvıştəşe. Rayoni Subh, Təzəkənd, Mayak, Bankə, Kurkənd, Uzunbabali, Şirvanli, Tatarməhəllə dionədə problem xeyli şiddətin bıə. İcra Hakimiyyətədə operativə ğərorqoh onoəşone. “Azərsu” muəssisə rəsmiyonən ım fakt təsdıq kardəşone, votəşone ki, bo Natəcolə dion 20 qılə ovkırniə maşin co kardəşone ki, əhali de peşomə ovi təminati bə ğaydə eğandon.
Hokuməti rəsmiyon Kurə ruədə ovi kam bıe de təbii səbəbon anqıl kardəşone. Əmo ekoaktivist Cavid Qara fikir jıqoe ki, Qurcistoni əraziədə bə Kur 300 qılə ru emedə. Isət Kuri bə Kaspi nırəse əsasə səbəb təbii ni, ovi de həvəşiəti istismar kardeyədəy. Ekoloq Telman Zeynalovən votedə ki, ım problemi əsasə qıno Minqəçeviri Ovə Ambo rəhbəriyyətikue. 2010-minə soriən ım problem hestbe, Bokuku komissiya bə Minqəçevir dəro qıniəcəğın, əvon ovə ambo və vadoşone, ovayzi kanalon pur kardışe, ətrofə məntəğəon eğətışe. Ovə Ambo mudirşon isə çe koyku beğandıe, problemən de hosoni həll bıe.
Isətən həmonə əhvolət təkrar bedə. Devləti əlağədar təşkilaton zəhmət bıkəşon bışon Minqəçevir. Ovə Ambo koy təftiş bıkardon, bəvinden ki, problem kom vırədəy.
İğtisadşunas Qubad İbadoğluən ovi ğıtiəti səbəbi ekoloji behranədə ne, meliorasiya sahə befərə məmuron tərəfo idarə kardeyədə, vəzifədaron monopoliya, korrupsiya və rışvəxorətiədə vindedə. Mutəxəssison və məsul şəxson monopoliston tarsiku ım problemi səbəbi bə zıvon varde pidəşonni. Bı səbəbən respublikadə ovi problemi həll karde bə mışğıl peqardə.
