Az.R de Avropa İttifaği arədə saziş bo keynə mande

Postsovet məkani devləton bəştə nufuz dairə cəlb karde çe Avropa İttifaği əsasə məğsədonədə qıleye. Bımi ro ey Şərğ Həmkarəti nomədə qıley saziş hozo kardəşe, Qurciston, Ukrayna, Moldova və Erməniston devləton bə ım saziş cəlb karde zınəşe.

Dəvardə manqi 18-də bə ım Sazişi daxil devlətə sərdaron videokonfrans formatədə Sammit dəvunişone, əyo İlham Əliyeviən iştirak və votemon kardışe. 2017-minə soriku Brusseli rəsmiyon de Əliyevi hokuməti bə Sazişi umjən qınie həxədə molağaton bardedən. Huğuğə mudafiəkar Anar Məmmədli bo Azadi Radio qəp jəşe ki, Azərbaycani bə Sərğ Həmkarəti sazişi umjən qıniedə əsasə maneə əve ki, Boku hokuməti bə bəşəri huğuğ və azadion əməl karde dair bəştə səpe təəhhudon peqəte pidəşni. Jıqo holədə , həmən Azərbaycanədə 100-sə vey siyasiə məhbuson mevcud bıə vaxtədə Boku tərəf hətto bə sazişi ğol bıkəşoən Avropa parlament ey çətin ki, ratifikasiya bıkardo.

Sosial Tədğiğatə Mərkəzi sədr, deputat Zahid Oruc`i fikir isə jıqoe ki, ım koədə çe reqioni bənə Rusiya və İroni devləton mənafe bə nəzər se lozime. 2013-minə sori Ukrayna prezident Yanukoviçi bı məsələdə balans oqəte nıznışe, nətiçəşən əv bıe ki, Ukraynadə inğilab vağeə bıe, ey həm ıştə hakimiyyət, həmən devləti ərazi 2 qılə muhummə hissə qin kardışe. Azərbaycani hokumətən bı koədə bə tadibəsə hərəkəti ro doe nibəzıne. Devləti siyasi elita bəpe adekvat hərəkət bıko.

Avropa İttifaği komissaronədə qıley Oliver Vareli bə Şərğ Həmkarəti devləti Xarici Koon vəziron videokanfransi həsr bıə mətbuatə konfransədə bəyon kardəşe ki, Avropa İttifağ de Azərbaycaniən viza rejimi hoson karde məsələ həxədə muzakirə barde hozoe. “Azadlıq.info” ğeyd kardedə ki, çe Avropa ali numayəndə həmonə mətbuatə konfransadə elan kardəşe ki, Avropa bəştə Şərğə Həmkarə devləton oşko votedə ki, ıştə qıvoninə vaxtonədə bəmə peştıpur bıe bəzıneyon.