Boku hokumət ovi problemi həll karde ro kom tədbiron vindedə.

Az.R-ədə ovi problem dəvom kardedə. Im, ıştənən iqlə ımsor ne, çand sorone ki, mevcude. Əhali arxon lırdinə ovi sətij kardedən , ey peşome məcburiyyətədə mandedən.

Adətən hokuməti rəsmiyon ovi ğıtiəti bə təbii amilon anqıl kardedən, əmo ım jıqo ni. Çe Aran rayonon munbitə zəminon məmuron və vəzifədaron qətm kardəşone, əyo ıştə fermerə təsərrufaton onoəşone, kanalon okırniəşone, bedune şərt ovə ehtiyaton bə çəvon təsərrufaron rubedən, əvon bo ovi məsrəfi ro  bə “Azərsu” və Meliorasiya təsərrufati muəssisəon hiç pulən avjor kardednin. Devləti resurs və səlahiyyəton həmə çəvon dastədən, hiç qıley təşkilatən bə çəvon ovi ğeyri-məhdud miğdarədə məsrəfi etiraz karde ro hınəşon rəsedəni. Çəvon behəyoəti nəticən əv bedə ki, hırdə fermeron və bumiə əhali ovi nırəsəyku əziyyət kəşedən. Imsori apreli 15-də prezident Əliyevi ovi ehtiyatonku səmərənin istifadə karde həxədə sərəncom doşe, ım sərəncomi icra de Sər vəziri muavin Şahin Mustafayevi sədarəti təşkil bıə Komissiya aspardışe. “Azadlıq.info” nıvıştedə ki, tosə ısət ım komissiya kardə koon barədə hələ ki, məlumat miyonədə ni.

Im sori əvvəliku devləti sərdari Respublika rayononədə 391 qılə artezianə çoli kande ro bə Meliorasiya və Ovə təsərrufat Ojə Səhmdarə Camiyyəti 32 milyon mənot pul co karde barədə 27 qılə sərəncom doəşe.  Həmonə vəsaiti 1 milyon bo Naxçıvani co kardəşone , əmo əyo çand qılə coli kande nəzərədə qəte həxədə məlumat doəşon ni. Eyən votedən ki, Ağsu , Ğusar və Biləsuvar rayononədə col nibəkanden, arx obəkırnen. Sori əvvəliku hokuməti ım layihon icra karde barədə tosə ısət hiç qıley məlumat elan kardəş ni.

Əmo əhali bo peşomə ovi ələtəşnə bıə vaxtədə de iyuni 4 Melorasiya və ovi təsərrufari həmkaron peşə idi munasibəti İlham Əliyevi bə ım sahə mutəxəssisonədə 8 kəsi zəhmətdarə muhəndis nom doəşe,  6 nəfər de “Əmək” ordeni, 24 nərəfən  de “Tərəğği” medali təltif kardışe.

Məqəvuji  əvon ıştə ko kardə sahədə mevcud tənəzzuli bə prezidenti bənə tərəğği təğdim karde zınəşone.