Boku mərizxonəon de Koronə noxəşinon pur bıən?
Bə Boku hokuməti doə rəsmiə məlumati əsasən Respublikadə bə COVİD -19 virusi mubtəlo bıəkəson miğdar 9 həzo nəfərisən dəvardə. Har ruj ım noxəşinon miğdar 500 kəsisən vey ziyod bedə. Boku mərizxonəon həni de vırə nıbe vonə əvoni bə stasionar ğəbul kardedənin, bo mualicə ro bə kə vığandedən.
Mustəğilə muşahidəkaron bımi de şubhə diə kardedən. Çunki məmləkətədə rəsmən 563 qılə mərizxonə, əyoən 44 həzo çarpayi mevcude. İğtisadşunas alim Qubad İbadoğlu de “Azadlıq.info” vasitə ıştə nəzəron bə cəmiyyəti nəzə rosniəşe. Əv votedə ki, hələ yanvarə manqədə İlham Əliyevi bəyon kardşbe ki, Respublikadə 700 qılə mərizxonə inşa kardəşone. 2003-minə sori statistika nişon dodəbe ki, məmləkətədə 738 qılə mərizxonə fəaliyyətış heste. Bı dəvardə soronədə 175 qılə mərizxonə kam bıe bə i tərəf bımando, pandemiya əhatə kardə 3 manqədə cəmi 500 çarpayinə 5 qılə modul mərizxonə onoə bıə. Tibbi həmkaron, yəni doktor və şəfğətə hovəon umumi miğdarən 54 həzo nəfərisən veye, yəni kafi ğədəre. Dəvardə sori devlətə budcədə bo səhiyyə 873 milyon mənot nəzərədə qətəşonbebu, ımsor həmonə vəsait bə 1 milyard 370 milyon mənot rosniə bıə. Bəs bə korona mubtəlo bıə noxəşinon bə stasionar dəğande ro boçi vırə rəsedəni? Çe ım faktonku oşko bedə ki, mərizxonəon və çarpayıon miğdar vey nişon doəşone, əslədə anədə ni, kame. Bı əmələdə məğsəd budçə pulon dələmurd kardeye.
Dıminə şubhə çe suni nəfəs aparaton miğdarədəy. Pandemiya bino beədə devləti rəsmiyon elan kardışone ki, bə məmləkət 200 qılə cı aparatədə tojə hıriəşone, vardəşone, mərizxonoəonədə tazisə noəşone. Əmo ısət məlum bedə ki, həmonə aparati 1 qılə ğıymət ki, 150 həzo dollare, bə Boku 40 ğat boho – bə 6 milyon dollar omə beşə. Bı səbəbən ısət Respublikadə suni nəfəs aparat 200 qılə ne, cəmi 6 qıləy. Hokuməti tərkibədə jıqo korrupsiya əməlon çanədə dəvom bıko, əhali həmişə ım ğədər zəraləti dılədə bəbe.
