Qəncə hadisonku 2 sor dəvarde.

Çe Qəncə navkonə icra hakimiyyəti sərdar Elmar Vəliyevi Yunis Səfərovi tərəfo de qolulə je 2 sor təmom bıe. Həmonə hadisə bə peş şəhəri mərkəzi meydonədə mitinq təşkil bıe, Rəşad Beyukkişiyevi 2 nəfər polisə zabit de ğəmə jeşe kıştışe.

2 ruji bədiqə polison bə çey mandə vırə reyd dəvunişone əvşon dastqir karde əvəzi de bə polisi muğavimətə vonə ğətl kardışone. Çe Meydan TV bə ım məsələ həsr kardə məğalədə votə bedə ki, tosə ısət bə ım hadison 2 qılə nəzər heste: hokuməti tərəf ımi hakimiyyəti peqordınie ro terrorə tədbir hisob kardedə, əhali isə bə Yunisi hərəkəti İcra sərdariku bənə ğisas se ğıymət dodə. Bə Yunis Səfərovi polisxonədə işqəncə rizon əks kardə şəkilon sosialə şəbəkonədə pevolo beyən çe Respublika ictimaiyyəti yodədəy.

Haliyədə de Qəncə hadison əlağədar 70 nəfərisən vey odəm məhbəsədəy. Bəvon 6 soriku tosə 18 sori zindonə cəzo bırişone. De ım hadison əlağədar ittiham bıəkəson, Yunis Səfərovən daxil orəxnə qrupi məhkəmə karantinə rejimi səbəbiku dəvunidənin. Sıftənə məhkəmə iclasonədə Səfərovi ıştən ğismən qınokar zınəşe, de ğisas se məğsədi bə ım əməli rəvoc doe etiraf kardəşe. Çey vəkil Bəxtiyar Hacıyevi bə Azadi Radio məlumat doəşe ki, Yunis cinayəti motivi barədə de  ittihamnamə nıvıştəyon ki, quya devlətə peqordımon hozo kardəşonebən, rozi ni. Bə qi qətedə ki, Elmar Vəliyevi şəxsən bə çey ıştəni ne, bə Qəncə əhali təhğiramizə munasibəti qorə de qolulə jəşe.

Şəhla Humbətova Qəncə məhbusonədə çe 4 kəsi vəkil bıə. Əv votedə ki, bəvon munasibətədə bə nav doə rəsmi ittihamon tam beəsos bin, məhkəmədə çəvon hiç qılə subut nıbe. İttihami tərəfi bəvon qonə işqəncəon tətbiğ kardəşbe, ımi subut kardə əlamətonən çəşə vədə bıe, əmo məhkəmə ım fakton tədğiğ nıkardışe. Qəncə hadison əsasə səbəb hokuməti məmuri bə əhali ğeyri-insoni munasibət bıe. Yunisi əv jə bəpeş, hokuməti bə anədə odəmi numayişkaranə şəkilədə beysurə divon qəteədəş məğsəd şəhrıvandon torsonie bıe ki,  i kərən bə jıqo əməli  dast qande ro curət nıkardon.