Korona pandemiya çe Az.R səhiyyə sahə nağisəti bə oşko bekardəşe.
Çe Az.R səhiyyə sahədə nırəsəyon barədə keşvəri Mass-mediadə vey nıvıştəşone, təhlilqəron vey votəşone, əmo Əliyevi hokuməti ım vəziyyəti sərost karde ro hiç qıley əməli tədbir bə jimon dəvuniəşni. Bə səhiyyə aid muxtəlifə muəssisəonədə nağisə vəziyyəton qıleyən Sipiə Ciqəri Noxəşi Elmi-Tədğiğatə İnstitutədəy.
Vəkil Samir Zeynalovi bı barədə bə “Sputnik Azərbaycan” sayti məlumat doəşe ki, ım muəssisə bo koronavirusə noxəşinon co kardəşone, əmo direktor Həğiğət Ğədirova bə noxəşinon xidmət kardə həmkaron tibbiə olət və maska dodəni. Bı səbəbən çəvon arədə bə korona mubtəlo bəkəson şe-şe ziyod bedə. Jıqo vəziyyət həmən Azərbaycani Tibb Universiteti Tədris Cərrahiyyə Klinika və Tədris Terapiya Klinikadən mevcude. Çe Cərrahiyyə Klinika 33 nəfər, çe Terapiya Klinika 24 nəfər koəkə bə ım virusi mubtəlo bıə.
Rayononədən rışvəxorəti, korrupsiya səhiyyə sistem bə iflic vəziyyət eğandəşe. “Teref.az” sayt Masəlu rayoni səhiyyə barədə nıvıştedə ki, əyo səhiyyə sistemi ıştəni bə təcili tibbi mudaxilə ehtiyac hestışe. Im rayonədə 230 həzo əhali jidə. Bəvon har ruj cəmi 1 qılə Təcili Tibbiə Koməki maşin bə xidmət beşedə, ımən əlbəttə ki, kafi ni. Bı səbəbən əhali ıştə noxəşinon bə mərizxonə barde ro xusisiə avtomaşinono istifadə karde məcbur bedə.
“Maide.az” xəbə doəşe ki, Abşeron rayoni Təcili Tibbi Koməki həmkaron etirazə aksiya dəvuniəşone, bə muxbiron votəşone ki, əvon maşini deştə puli təmir kardedən, benzini puli çe noxəşinonku sedən bə səbəb ki, mudriyyət bəvon ımi dodəni, tələb kardəşone ki, jıqo dələdızdə əməlonku dast bıkəşon, həmən bə çəvon məvacibi xidməti əlavon ziyod bıkardon.
Saatlı rayoni 27 sinninə əji Fəridə İsayeva bə Meydan TV şikat kardəşe ki, əv talassemiya noxəşine. Rayoni Mərkəzi Mərizxonə rəhbəriyyət çey ım noxəşi bəpe təsdiğ bıko ki, əv de əliləti statusi pensiya se bızıno. Əmo əvon çeyku rışvə tələb kardedən.
Jurnalist Ramin Bayramilən ıştə pıə, ki, çe təblarz və şəkər mərəziku 10 ruji muddətədə doktoron səhlənkarəti nəticədə çı cur vəfat karde sərqozəşton barədə Meyran TV-ədə qıley məğalə dərc kardəşe, votəşe ki, çey ımi nıvışteədə məğsədış ıme ki, cəmiyyət Respublikadə səhiyyə sistemi çanədə vironə vəziyyətədə bıe i kərən şoyd bıbo.
