Az.R -ədə koronavirusi test çiki biznese?

Haliyədə Az.R Səhiyyə Vəzarəti de TƏBİB – yəni Tibbi Ərazi Şebəon İdarəkardə İbemoni arədə ziddiyyəton xeyli qıvonin bıə. Pandemiya behrani vaxti Səhiyyə Vəzarət de koronavarusi mubarizəku tamam bə kəno noşone, karantinə tədbiron bə TƏBİB-i monopoliya dəğandışone. Hərçənd ki, ım təşkilat Respublikadə bo icbari tibbiə sığorta tətbiğ karde ro onoəşonbe.

Məmləkətədə korona behron bino bıe bəpeş,  de fakti ım təşkilati, və çey sərdar Ramin Bayramlı Səhiyyə Vəzarət ım prosesonku diəro kardışe , bə proseson, həmən bə maliyyə resurson  nəzarət tamam bəştə nəzarəti ji dənoşe. Vəhaliyən əv virusoloq ni, proktoloqe. Hejo çey ğeyri-peşəkarə ğərar və dəsturon bey səbəb bıe ki, keşvəri sər virusoloqi ıştə vəzifəku istefa doşe.

“Azadlıq.info” jıqo qıley ehtimal bə nav doəşe ki, maska ticarəti i qılə monopolisti inhisarədə bıe, beyo har manq 2 milyon 400 həzo mənot ğəzənc vardedə. Isət koronavirusə testi ticarətən bə həmonə monstri ehdə doəşone. Çin və Rusiyadə istehsal bıə jıqo teston ğıymət cəmi 3 dollariku tosə 5 dollarie. Imən de Azərbaycani puli 5-9 mənoti arədəy. TƏBİB sıftə odəmon bə 400 mənot test kardedəbe. Isət bə 140 mənot eğandəşe. De ım sayti bardə hisobi tosə ısət testə ticarətiku 55-60 milyon mənot xalis mənfəət bə dast vardəşone. Sayt ım məbləği bə kom monopolisti cif ru be həxədən ıştə ehtimalon bə nav dodə.

Azərbaycani Demokratikə Partiya sədr Sərdar Cəlaloğlu bə “Pravda.az” sayti votəşe ki, Səhiyyə Vəzarəti bıə vırədə bə TƏBİB təşkilati onoe ehtiyac nıbe. Koronavirusə teston devlət həvoy dəvunidə. Bı səbəbən şəhrıvandonku bımi ro pul se cinayəte. TƏBİBİ sərdar Bayramlı isə ım testi ıştə mərizxoədə bə 10-15 ğat bohoə ğıymət bə əhali kul epıştedə. Respublika Sər Prokurotura bəpe ım fakti  səpe eqıno, çinayətə ko bino bıko. Səhiyyə Vəzarəti səlahiyyətonən oqərdınie lozime ki, karantinə rejimi vəziyyətədə bə hərc-mərciəti və dıtirəti orəx doe mumkun bıbo.