Az.R-ədə ovi problemi çoko həll karde bəbe?

Orəxnə rujon Az.R-ədə ovi problem bə cəmiyyəti diğğəti cəlb kardə məsəlonədə qıley peqardə.

Hokuməti muvafiğ təşkilaton, analitikon, mutəxəssison ım mışğıli səbəbon və ey həll kardə roon barədə ıştə fikron Kutləviə İnformasiya Vasironədə votedən. Çəvoədə qıley – iğtisadşunas ekspert Vahid Məhərrəmov “Turan” İnformasiya Ağentiyyəti saytədə ğeyd kardedə ki, Beynəlxalğə Təbii Resurson İnstituti hozo kardə hesabatədə tosə 2040-minə sori de hışkə həvosati dimbədim mandə keşvəron dılədə Azərbaycani nomən heste, əv de həmonə xəto vəbəvə mandə 33 qılə devləton miyonədə 18-minə vırədə mandedə. Məhərrəmov ğeyd kardedə ki, çəmə problem hiçən ovi resurson kam beədə ni, tədğiğati nəticəon oşko nişon dodən ki, məmləkəti tələbatisən 7-8 kərə vey ovə resurs hestışe. Çəmə mışğıli əsasə rişə ovi ifrat dərəcədə məsrəf kardeədəy. 2-3 sor bə nav hokuməti Taxtakerpu və Şəmkirçay ovə amboon inşa kardışe, bımi muvafiğən 700 milyon və 1 milyard mənot vəsait xarc bıe, əmo ım tədbiron bə problemi həlli komək nıkardışe, çunki jıqo ovə mənbəon çe vəzifədaron və oliqarxon nəzarəti jitonon, bə çəvon təsərrufaton təminati xidmət kardedən.  Bə Respublika Statistika İdarə doə rəğəmon əsasən Azərbaycan Mustəğilə Devləton İbemonə keşvəron restədə ovi israf kardeədə de 28%-i iminə vırədə mandedə. Melorasiya və Ovə təsərrufat Ojə Səhmdarə Cəmiyyəti balansi kanal və anboon dəvardə əsri 40-70-minə soronədə de kanə texnoloqiya okırniə bıə, bə xeyli miğdarədə ovi qin bıe səbəb bedə . Çimi vəy se ro muasirə texnoloji imkanon tətbiğ karde vacibe. Çəvonədə qıley ovi bə kaştə zəminon de dıjdədiametrinə luləon nəğl kardeye.

Haqqın.az saytən xəbə dodə ki, bə Araz ruy həndəvəri rayonon ovi problemi həlli komək  karde ro Boku hokuməti bə İroni muraciət kardəşe. Ironi tərəfən bə ım muraciəti hay doəşe, çe Araz ovəamboku ru bıə ovi miğdar vey kardəşe ki, ımən çe Saatli və ətrofi məntəğə əhali ovi mışğıl xeyli bə səhmon eğandəşe.