Sanqəçolə nezi ğazə lulə boçi tıpe

Kanə sori dekabrə manqi 27-ədə Sanqəçolə ğəsəbə nezi ki, çe Bokuku 100 km diəroe, maqistral ğazə lulə tıpey. De Fevğəladə Hadison Vəzarət və SOCAR- i həmkaron bahəm səyi ım ğəzo nəticon kutoh müddətədə çe arə bardışone. Əmo yanvari 2-minə ruji həmonə hadisə, həmonə vırədə eynən ikərən təkrar be.

Natə Şirkəti ım ğəzo səbəb, əraziədə zəmini vajie və fırsie nəticədə lulədə çək bə əməl ome, həmən  materiali keyfiyyət saru be səbəbiku izah kardışe. Əmo 2-minə tıpemoni barədə jəqo qıley məntiği izahat nıdoşone.

De ım hadison əlağədar "Musavat.com" sayt qıley məğalədə nıvıştedə ki, dekabri 26-ədə, yəni bo sıftənə tıpemoni 1 ruj mandə Youtube-ədə çe İŞİD-i qıley azərbaycanıjə terrorçi video müraciətədə bə Azərbaycani "dar-ul-kufr" votedəbe və iyo əhali bə ğiyam vanq kardedəbe. 2-minə tıpemoni bə peştə sosial şəbəkonədə çe Hələbiku bə Az.R qlıey terrorçi daxil be barədə məlumaton pevolo kardəşonbe, votedəbin ki, Bokuədə xüsusi xidmət orğanon ə odəmi axtar kardedən.

Devlət Əmniyyətə Xidməti orəxnə 2 manqədə 3 kəs İŞİD-çi kışte, çand kəsiən dəstqir karde barədə rəsmi məlumat doəşbe.

"Politika.az" sayt ponə sori oktyabrədə çe Suriyaku pənahəndeon bə Az.R ome həxədə  xəbə dodəşbe. Nıvıştəşbe ki, politoloq Ərəstun Oruclu votedə ki, İrağ və Suriya münağişə ərazionku bə çəmə məmləkət pənahəndeon ovaştedən. Əvoni Türkiyə təşkilaton himayə kardedən, de həvapeyma reyson bə Boku vığandedən. Əsas əve ki, Prezident Adminstrasiyadə şebə müdir Fuad Əliəsğəroviən im fakt rəsmən təsdiğ kardəşbe.