Moskvada azərbaycanıjon bo "Nardarani məhbuson" azadi tələb kardışone

Yanvari 5-minə ruji Moskvadə azərbaycanıjon i qrup çe Az.R səfarəti vədə etirazə aksiya dəvuniəşone. Əvon Mısılmonon İbemonə Hərəkati sədr Taleh Bağırzadə və çey həmməsləkon şəkilon, həmən siyasi şüaron ıştə dastonədə qətəşone, çe Azərbaycani hokumətiku bo dini, həmən diqər siyasi məhbuson azadi tələb kardəşone. Bı barədə "Azadlıq.info" sayti xəbə doəşe və ğıssə video süjet pevolo kardəşe

Əlbəttə Rusiya mərkəz - Moskvadə azərbaycanıjə dini və siyasi fəalon ıştə vətən - Azərbaycanədə bə beədalətiə və nohəxə siyasəti  etiraz karde vey çokə koe, çimi bəpeştən im cürə demokratik sivil hərəkəton dəvom karde zərurie. Moskva şəhərədə çand qılə dini təşkilat be -be çəvon rəhbəron bı tədbirədə iştirak nıkarde, bə ım aksiya kortəbii qıley təəssürat dodəbe. Im hejo bə video süjeti diə kardeədən vində bedəbe. Tam oşkoe ki, Rusiyadə Az.R xüsusi xidmət orğanon təsir zümande, əmo ım əsas ni ki, bə zülmi məruz mandə odəm ıştə həxə sədo bekarde bıtarso, bə Az.R hokuməti zülmi ıştə qiy kəc bıko.

Jıqo qıley cəhətiən ğeyd karde lozime ki, bə ım xəbə ğeyr-əz "Azadlıq.info", Az.R hiç qıley, hətto dini saytonədən rast ome mümkün nıbe. Imən  bə Boku hokuməti zülm və beədalətinə siyasəti etiraz kardə siyasi ğıvvon çanədə ğeyri-mütəşəkkil və pərakəndə be nişon dodə.