Rusiyə mudafiyə vəzir de İlham Əliyev vindemonış karde.
Azərbaycan Respublika prezident de Rusiyə mudafiyə vəzir iyən çəy heyəti vindemon karde cərəyonədə Boku-İrəvani miyono tojə imzo bıə otəş basti tam icra bey tələbış karde.
Bə İrib raporti əsos, İlham Əliyev həminə vindemonədə bə Serqey Şoyqov votışe: Boku nəzəku tojə otəş basti maddon Azərbaycon Respublika iyən Ermənistoni tərəfo icra bey holədəy çən 2 tərəf həminə kanə dave sə kardeyro iyən bə siyasi mərhələ varid bey xoto hozzon.
Əliyev bə Ağdam şəhri otodəti iyən Azərbaycon Respublika ətteşi bə ım şəhr varid bey işarə iyən əlovəş karde: Ğərəboğədə Rusiyə sulhmərominə ğıvvon işterakiku himoyədorəti kardedəmon boçi ki ım məsələ məntəğədə qıləy stabilə şərayeti icod kard bois bəbe.
Azərbaycan Respublika prezident bə Ğərəboği tojə dıvrə canqi cərəyonədə Azərbaycan Respublika ğeyri hərbi şahrvandonku 94 nəfəri kışte iyən 400 nəfəri zəxmin bey işarə və təkidış karde: sulh sazışi imzo beyku tosə bə ısət otəş bast ciddi forma darıştə bə ni.
Ğeyd kardənine ki çimi bənav Rusiyə mudafiyə vəzir Serqey Şoyqov İrəvonədə de Ermənistoni i minnə vəzir Nikol Paşiniyan vindemoni cərəyonədə 2 tərəfi həmkarion xususi Ğərəboği barədə muzakirə və sohbətış kardə be.
Rusiyə, Azərbaycan Respublika iyən Erməniston 2şanbə ruji Noyabri 10 Ğərəboğədə canqi səkardeyro qıləy mıştərək sazışi imzo kardışone.
Həminə sazişədə sıvoy canqi sə karde, bə humanitar məsələon iyən əsiron və cənazəon vırə bə vırə kardey təkid bıə iyan ğeyd be ki Rusiyə sulhmərominə ğıvvon təmas və dave xəttədə sulhi təmin bəkan.
Ğərəboği barədə Azərbaycon Respublika iyən Ermənistoni miyono tojə dıvrə daveon Sentiyabrə manqi 27 ku bino bıə be.
