Canqiku mandə minaon bo Azərbaycan Respublika bənə qıləy yolə behron əvəz be.

Canqiku mandə minaon bo Azərbaycan Respublika tojə ozod bıə əraziədə obdonəkə koon əncom doe bənə qıləy yolə mane əvəz be.

Bə İrib raporti əsos iyən Azərbaycan Respublika hərbi experton nəğliku Ğərəboği 30 faiz tojə ozod bıə əraziədə mandə minaon ısət ım məntəğədə əmniyəti tam icod kardey vədə maneon bois bıə.

Im niqətronəti qıle holədəy ki Azərbaycan Respublika hərbi muhəndison de Tırkiyə hərbi komət iyən Rusiyə eksperton işteraki 44 rujə canqi bə oxo rəseku tosə bə ısət məntəğədə mandə minaon beəsər və xunsa kerdeyro bə cəhdin.

Ğərəboğədə Azərbaycon Respublika iyən Ermənistoni miyono tojə dıvrə daveon dəvardə sori Sentiyabrə manqi 27 ku bino bıə be ki oxoy sə 2020-ə sori Noyabri 10 Rusiyə, Azərbaycan Respublika iyən Erməniston ım dıvrə canqi səkardeyro qıləy mıştərək sazışi imzo kardışone.

Həminə sazişədə sıvoy canqi sə karde, bə humanitar məsələon iyən əsiron və cənazəon vırə bə vırə kardey təkid bıə iyan ğeyd be ki Rusiyə sulhmərominə ğıvvon təmas və dave xəttədə sulhi təmin bəkan.

Ğeyd kardənine ki Ğərəboği muxtəlif baxşon əmniyəti təmin karde tosə 5 sor bə Rusiyə sulhbanon qi haştə bəy, peşo bəzi məntəğəon tale barədə ğərolon təin bəbe.