Rayoni İcra sərdaron ıştənbəsəti səbəb çiçe?

Azərbaycanə Respublika inzibati ərazi 66 qılə rayon 14 qılə şəhəro ibarəte. Bə ım məntəğəon prezident ıştə icra sərdaron təyin kardedə

Həmonə sərdaron bevasitə bə prezidenti tabe bıe səbəbiku, çəvon rəhbərəti kardə rayon və şəhəri huğuğ muhafizə orqanon bəvon nəzarət karde imkaniku mərhumin. Hejo bı səbəbən ım sərdaron bə har curə ıştənbəsə hərəkəton ro dodən, çəvon rışvəxorətiku əhali bə zinhor omə. Məsələn, “Azadlıq.info” xəbə dodə ki, Ğuba rayoni İcra sərdar Ziyəddin Əliyev  dəvardə sori 200 nəfər quya bə ko peqətəşe, bəvon har manq 250 mənot məvacib co kardəşe, fevral, mart, aptelə manqon muddətədə de çəvon karti vasitə 150 həzo mənot devlətə budcə vəsait dələmurd kardəşe. Hejo jıqo dələdızdə əməlon nəticəy ki, 2005-minə soriku reqionon sosial-iğtisadi inkişafi təmin karde ro Devləti tərəfo 75 milyard mənot vəsait xarc bıə, əmo rayononədə hiç qıley inkişafi sə qətəş ni, keşvəri Umum Daxili Məhsuli 93% Boku-Abşeron reqionədə  istehsal bedə. Rayonon çoko 15 sor çimi bə nav de dotasiya jidəbin, ısətən bə devləti dotasiya mehtocin. 2019-2020-minə soronədə Devlətə Əmniyyətə Xidməti 6 qılə rayoni İcra sərdar dastqir kardışe. Əmo ımi rayonon idarə koonədə hiç qıley foydə bə əməl nıvardışe.

Im ğədər kolhındə usuli idarə islah karde zərurəti məqəvuji hakim elita ıştənən dərəsedə. Milli Məclisi iclasədə deputat Ğogrət Həsənğuliyevi bı barədə votəşe ki, prezidenti tərəfo təyin bıə məmuron bə xalği ne, bə prezidenti hesabat dodən. Imən çe bələdiyyon səlahiyyəti ziyod karde zəruriyyəti bə meydon vardedə. Bı koədə çe dınyo təcrubəku istifadə karde lozime. Im təcrubə nişon dodə ki, reqiononədə hakimiyyəti bəpe xalğ təşkil bıko. Bəomə vaxtonədə ıcra hakimiyyəti təsisat bəpe ləğv kardə, çəvon səlahiyyət bə bələdiyyon doə bıbo.                                  İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.