Boku hokuməti məmuron keynə deklarasiya bədon

Orəxnə vaxton devləti vəsiləonədə korrupsiya, budcə vəsaiton ğeyri-şəffaf məsrəf bıe, penə məğaminə məmuron de milyonon bə sə omə mılk və villaon barədə respublika KİV-ədə rə-rə bə məlumaton rast omə bedə

Imən məlume ki, çe dınyo navğədəmə devləton məmuron ıştə har sornə ğəzənci barədə bə cəmiyyəti məlumat dodən, çəvon bı məzmunədə deklarasiya elan karde məcburiyyətşon heste. Azərbaycanə Respublikadən jıqo qıley ğanun dee 2005-minə sori ğəbul bıə və əv tosə ısət ğıvvədəy, əmo 16 sore ki, devlətə məmuronədə nəinki hiç kəs bey pape bedəni, hətta hiç qıley devlətə təsisat çəvonku ım ğanuni icra tələb kardedəni.

“Teref.az” sayt çe iğtisadşunas Natiğ Cəfərli ım problimi həxədə fikron bə əhandon rosniəşe. Cəfərli votəşe ki, hokumət 16 sori muddətədə ım ğanuni icra təmin kardedənibu, ım ey nişon dodə ki, əyo nıştə vəzifədaron bımədə marağ hestışone, yəni ım ğanun bə çəvon mənafe zidde. Əqər nafko məmuron ıştə molı-mılkon bəştə ğohomon nom rəsmi kardedəbinbu, ısət əvon anə bəştə xatırcamin ki, həmonə varidati bəştə nom nıvışteku rəmedənin.

İğtisadşunasi həmən ğeyd kardəşe ki, ım məsələ bə səhmon dənoe ro çe Rusiya təcrubəku istifadə karde bəbe. Əyo sıftə Prezidenti və Sər Vəziri har sor ıştə mədaxili elan kardə deklarasiya bəyon kardışone. Jinə məmuronən məcbur mandin ki, həmonə ğanuni icra bıkardon. Azərbaycanədən çok əbi ki, devləti rəhbəriyyət ım koy bino bıno, jinə vəzifədaronən bə ım ğanuni riayət karde məcburiyyətədə bəmanden. Bəvədə qaspu çəvonku tikəvone məsuliyyət bə əməl bo, devləti budcə vəsaiti dələmurd kardeku bırəmon.

İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.