Deputati çe Boku hokuməti usuli idarə tənğid kardışe

Milli Məclisi uzv Razi Nurullayev ponə sori parlament entexabatonədə deputat vıjniə bıə

Dəvardə rujon ey bə “Modern.az” sayti doə musahibədə çe Respublika mevcud idarəçiəti sistem bə tənğidi hədəf kardəşe. Votəşe ki, “ ısət məmləkətədə kom məmuri oşandoş, ciddi təftiş bıkoş, bəpe ey bə zindon şodoş. Çunki tosə ısət Azərbaycanədə bo sof ko karde ro şərait bıə ni. Har kəs de həm ıştə, həmən yəndı əməlon eparçınie məşğul bıə. Jıqo vəziyyəti cəmiyyətış bənə huəme pepıştə. Im mışğıli həll karde ro iminə nubədə bəpe siyasi sistemədə korrupsiya çe arə bıbardi. Həmən Konstitusiyadə əvəzon bıkardi. Im curə usuli idarə bə vəc nıome. Qıley tojə sistem onoe lozime. Cənab Perzidentən bımi ro kulışedə. Əmo nəticə hələ ki, xeyli sarue”.

Marti 5-minə ruji hakim Tojə Azərbaycanə Partiya ıştə nubəku bə kənoə - VII konqres dəvonişe. Parlamenti 122 kəs deputatonədə 70 kəs çe ım partiya uzvin. Bı Konqresədə Prezident İlham Əliyeviən iştirakış bıe, məruzə kardışe. İslahaton barde vacibəti məxsusi ehandışe. Im qırdbemoni nəticə əv bıe ki, partya Siyasi Şura ki, 20 nəfəro ibarət bıe, 40 nəfəro ibarət de İdarə Heyəti əvəz kardışone. Qıley Veteranon Şura onışone. Çe Siyasi Şura 11 nəfər kanə uzvon ki, bə tojə İdarə Heyət daxil nıkardışone, əvonşon bə ım Veteranon Şura dəğande. 6 qılə siyasiə partiya bə hakim partiya umjən qınie, rozi bıe ki, çey dılə`də ov bıbo.

Demiən hakim partiya ali məclisi qırdbemon bə sə qınie. Çey ıştə restədə və ıştə koonədə bardə islahat demiən  orəxe. Deputat Razi Nurullayev isə hələən umudəvoe ki, Prezident devləti idarə sistemədə de islahaton barde məşğule.