Az.R əhali Nəvuzə idi tətilə rujonədə.

Bə Boku hokuməti ğərori muvafiğ Respublikadə bo Nəvizə idi tətili 9 ruj – yəni martə manqi 20- 28-minə rujon muəyyən kardəşone. Im rujonən, məlume ki, bə karantinə vaxti təsaduf kardedə. Çe Vəziron Kabineton tono Operativə Ğərarqohi de Koronavirusi pandemiya əlağədar karantin rejimi muddət tosə iyunə manqi 1-minə ruji dıroz kardəşe. Im muddəti dırozi metro ko nibəkarde.

Bo idə tətili nəzərədə qətə bıə 9 ruji muddətədə şəhəronədə ictimai nəğliyyati hərəkət dəparçıniə bəbe. Im məhdudiyyəton tətbiğədə məğsəd çe əhali aktiv hərəkəti kam kardeye ki, çe koronavirusi pevolo bıe vəy se mumkun bıbo. Ğərarqohi rəsmiyon ıştə təşkil kardə brifinqdə ımən elan kardəşone ki, orəxnə rujonədə bə virusi mubtəlo bıkəson miğdari ziyod bıe, əməni bə ciddi tədbiron dast ğande məcbur kardedə, əmo Nəvuzə idi tətilə rujonədə sərt tədbiron tətbiğ əkənimon. Karantinə vaxti vəyə , təvəlludə ruji ğeyd kardeyən ğədəğəne. Bə jıqo tədbiron dəvunie icazə doe hələ ki, Ğərərqohədə muzakirə bedəni.

Imən məlume ki, har idə tətilonədə əhali ıştə valideynon ziyarət karde ro  bə rayonon şedən. Bı rujonədə Boku avtovağzalo bə əyaləton dəro qıniə avtomobilon miğdar vey, həmən çəvon bə sərnişinon təklif kardə ğıymət boho bedə. Xususən Operativ Ğərarqohi rayonon arədə avtobuson hərəkəti ğədəğən karde bə ım məsələ xeyli mışğılon əlavə kardəşe. Həmən bo taksi və mini avtobus soybon, ğıyməti boho karde ro çokə şərait soxtəşe. Sərnişin Qulli İsmixanova bə “Sputnik Azərbaycan”i muxbiri votəşe ki, həmişə bə Qeyqey rayon bə 10 mənot əşi, ısət ğıymətşon bə 15 mənot ros kardə. “Teref.az” saytən AZAL-i bə İstambul reysi ğıymət çe 350 mənotiku bə 800 mənot ros karde həxədə xəbə doəşe. Bə turizmi dair ekspert Pənah Əlisoy`i ğeyd kardəşe ki, Azərbaycanədə aviabileton ğıymət bə dınyo vıjori nisvətədə xeyli bohoy.