AZAL şirkəti monopolistə siyasət.

Çe Azərbaycanə Respublika ictimai jimoni har sahədə ğıyməton xeyli boho bıe, ısət cəmiyyətədə ən vey muzakirə bıə mevzuy.

Devlətə Staristika Komitə elan kardəşe ki, fevralə manqi infilyasiya respublikadə 3,7 % bıə, ərzağə məhsulin ğıymətonədə 4,9%  ziyod muşahidə kardəşone. Əhali miyonə manqə məvacib isə 3% saru, yəni 710 mənotiku bə 690 mənot eqıniə. Muxalif analitikon ım rəğəmon hokuməti tərəfo kam nişon doe votedən, həmən ğeyd kardedən ki, realədə ğıyməton de miyonə hisobi 20-25% ros bıən. İnfilyasiya səviyyən təğribən anğədəre.

Bı muzakirəonədə ən vey vırə qətə mevzu AZAL aviasiya şirkəti ıştə reyson ğıyməti ikərədə çand ğat boho karde barədəy. “Teref.az” nıvıştedə ki, Tbilisiku bə İstambul aviasiya bileti ğıymət çe AZAL-I Bokuku bə İstanbul təklif kardə ğıymətisən 5-6 kərə erjone. Rusiya , Ukrayna, Ğəzəxıstoni şirkətonən xeyli erjonə ğıyməton təklif kardedən. Məsələn, Bokuku bə İstanbul bileti ğıymət bə 446 dollar, Kiyeviku bə 193 dollar, Moskvaku isə bə 245 dollare. “Az.politika.info” sayt ımiən bə nəzə rosnidə ki, xarici aviaşirkətonən bə Boku pərə reyson ğıymət anədə bohoy. Çimi qınoən çe AZAL-i qiyədəy. Çunki əv formalən bıbo, devləti muəssisə hisob bedə, bı səbəbən bə Azərbaycani aviasiya vıjor daxil bıə xariciə şirkəton vədə bəştə monopolistə ğıyməton əməl karde tələbi nodə, və har qıley xariçiə şirkətən bə çey tələbi muvafiğ ıştə bileton ğıyməti çe AZAL-i ğıymətisən kamişi boho noənine.

Meydan TV-ən bənə ım fakti təsdıği nıvıştedə ki, çe Turkiyə kambudcəninə “AnadoluJet” aviaşirkət de İstanbul-Boku-İstanbul marşruti pəremonon təşkil bəkarde. Çe AZAL-i balə şirkət “Buta” bı layihədə iştirak kardedə. Çey bə bileton noə məzənnə çe “Anadolujet”i təklif kardə ğıymətisən tikəvone erjone.

Çe AZAL şirkəti Azərbaycani aviasiya sərnişin kırniə vıjorədə monopolistə vəziyyət bə Respublika əhali ım curə ğarət bıe vardə bekardedə.