Az.R –də futboli suğut karde səbəb çiçe

Dınyo futbolə çempionati vıjniə mərhələdə Azərbaycanə Respubliuka milliə komanda bə Portuqaliya de 0:1 hisobi məğlub be

Yekanə ləp azərbaycanıjə hənəkkari ıştən bəştə kəybə jeşe. Əslədə bımi adi diə karde əbi, qirəm Azərbaycani furbolkaron ləpi bəştə kəybə jeədə adətkərdə bıə nəbin: Əvon tosə ısət 12 kərə bə jıqo hərəkəti muəllif bıən. Rəşad Sadığov bı koədə de 4 qılə avtoqoli lidere.

Deputat Tahir Kərimli Parlamentədə Respublika futboli bərbad vəziyyətədə bıe həxədə fəryad kardəşe, votəşe ki, keşvəri çempionatədə çoko bedə ki, çe rayononku  i qılə komanda iştirak kardedə, əmandəyon həmə çe Boku şəhəri komandonin. Bə çəvon həmməy SOCAR maliyyə dodə.

Meydan TV-ən bə Kərimli ım votəyon qıley məğalə həsr kardəşe, nıvıştəşe ki, vaxt hestbe Respublika Premyer Liqadə 14 qılə - çe Lankoni, Qəncə, İmişli, Yevlax, Tovuz, Zağatala və həniən çand qılə rayonon  komandaon hestbe. Əmo əvonşon bankrot karde. Bəvədə Milli Məclisədə ım nağisəti barədə həmonə rayonono vıjniə bıə deputatonədə hiç kəsi ıştə sədo benıkardışe. Isət ım rayonon stadiononədə mol-mələ covnidən. Dınyo miğyasədə bənə Azərbaycanı jıqo qıley məmləkət çətin ki, peydo kardə bıbo. Beynəlxalğə futboli ğanunədə bə komandaon i qılə mənbəku maliyyə  doe ğədəğəne, çoko bedə ki, FİFA, UEFA bə Azərbaycani Futbolə Federasiya jıqo kolhındə hərəkəti çəş vi kardedən.

Qıley vaxton, “İnter” klub hestbe, çey sponsor Azərbaycani Beynəlxalğə Bank və çeyən sədr Cahangir Hacıyev be, “Kaspi-Lankon” hestbe, çey sponsor “Palmali” şirkət və çey sədr Mubariz Mənsimov, Zağatala “Simurğ” komanda hestbe,  sponsorış Anar Bəkirov, “Bakı” komanda hestbe, prezidentış Hafiz Məmmədov. Im komandaon həmə ləğv bin, həmonə sponsoronən repressiya kardışone, dənoşone bə zindon.

Im fakton hiçən təsaduf nin,  çe devləti tərəfo bardə qıley monopolistə siyasəte. Im siyasət bənə ictimaiyyəti, iğtisadiyyati, maliyyə, ticarəti həmə sahəon, vərzeşi qıley sahə - futbolən bəpe monopoliya dastədə bıbo, çe i qılə mafiya nəzarəti jitono bımando. 

Co qılə sahəon vote nibəznem, əmo vərzeşi sahədə rəğabət çey inkişafi mutləğ atribute. Vərzeşədə rəğabəti ləğv kardə məmləkəti futbolkaron ləpi bəştə kəybə je labud və çəş kardə koey.

İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.