Boku hokuməti trol şəbəkə “Fasebook”ədə ijən fəal bıə

İsətnə zəmonədə sosialə şəbəkəon cəmiyyətədə ictimai rayi bə forma eğandeədə muhum rol hestışe

Bı səbəbən, məxsusən avtoritar hokuməton bə ım koy xususi əhəmiyyət dodən. Azərbaycanə Respublika devləti rəhbəriyyət isə bımi həddo ziyod nəzər səğandedə. Çunki çey bə Azərbaycani xalqi məxsus nıbə mənəviyyat və molyəton bey epışte məğsədış heste.

 Britaniya  The Guardian rujnomə bı həxədə dərc kardə məğalədə nıvıştedə ki, dıminə Ğərəboği canqi vaxti Feyzbuki bə Boku hokuməti trolə şəbəkə ğədəğə tətbiğ kardəşbe, de Azərbaycani hakim partiya əlağəninə 8 həzo səhifə moləşbe. Məğalə muəllif ğeyd kardedə ki, çe “Azad söz” xəbə aqentiyyəti Feyzbukədə qıley posti təhlil nişon doəşe ki, Azərbaycanə Respublika hokuməti trolon sənibəton bə fəaliyyət dəqıniən. Çunki 301 qılə koment ki, bə həmonə posti nıvıştəşonbe, çəvon 294 qılə tojə səhifəku vığandəşonbe. Iştənən həmonə şərhon bə ruj – maştə saat 9-ku tosə hanqomi saat 18 vığandə bıə.

Çe hokuməti trolə əməliyyati əsasə hədəfon “Azadlıq” rujnomə, Azadi Radio, Meydan TV və “Azad söz” portalon, həmən Azərbaycani Xalğə Cəbhə Partiya və çey rəhbəriyyət bıə. Həmonə partiya sədr Əli Kərimli votedə ki, Boku rejimi trol şəbəkədə 10 həzo ştatinə trol heste, əvon əsasən Bokuədə jidən, məvacib sedən, çe Tojə Azərbaycanə Partiya cıvonon təşkilati, Daxili Koon Vəzarəti və devləti co vəsiləon maliyyə co kardə Ğeyri Hokumətə Təşkilati uzvonin.

Tojə Azərbaycanə Partiya vəzifədaron bə Qardian rujnomə vığandə parsi cəvob doəşon ni. Məğalə muəllif ıştə nıvıştəy orəxədə ğeyd kardedə ki, Azərbaycanə Respublikadə repressiya səviyyə anədə barze ki, Feyzbuk bəpe bə rejimi çe forumi ğaydəon darışte imkan nıdo. Çunki  sosialə şəbəkəon çe ım respublika odəmon ıştə fikron azad istifadə karde ro yekanə vasitəy.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.