Az.R-ədə icbari tibbi sığorta tətbiğ bino bedə

Har qıley sivil devlət ıştə şəhrvandon saleməti təmin karde ro bə çəvon səhiyyə əmniyyəti təminat doənine. Çimiən sərostə ro çəmiyyətədə icbari sığorta ğanuni tətbiğ kardeye. Az.R rəhbəriyyət daima məmləkəti çe Avropa sivil devlətonədə qıley be həxədə ıştəntarifinə sıxanon votedən. Əmo tosə ısət bə əhali tibbi xidməti təminat nıdoe, çəvon votə sıxanon bə du bekardedəbe.

2000- minə soron əvvələdə hətto İcbari tibbi sığorta həxədə ğanun ğəbulən kardəşonbe. Əmo tosə ısət bo çey tətbiğ karde ro bə ğərar ome zınedənıbin.

Isət hokumət bə ğərar omə ki, ım sor yanvari 1-ku Respublika 2 qılə məntəğədə - Minqəçevir şəhər və Yevlax rayoni devlət səhiyyə müəssison müəyyən sahonədə ım ğanuni tələbon de təcrübə məğsədi tətbiğ bıkon. Əqər nəticəş müsbət bıbo, bəvədə ım ğanuni bə Respublika diqər nayihon, və tibbi müəssison diqər sahonən tətbiğ bəkarden.

Ğanunədə nəzərədə qətə bedə ki, kosibə ailə üzvon, şikəston, əğılon və tələbon icbari tibbi sığorta devlət bəştə ehdə pebəğəte.

Əmo sığorta avjori miğdar hələ müəyyən kardəşon ni. "Cəbhə.info" sayti nəzər jıqoe ki, ım avjori miğdar müəyyən nıbə sığorta ğanuni tətbiğ karde mümkün nibəbe. Hələ ki, bo ım 2 qılə məntəğə tibbi xidməti ğıyməton müəyyən bıən və əvon hiçən erjon nin. Sığorta avjori məbləği müəyyən karde bə sığorta idarə həvolə kardəşone. Im idarə hələ ki, həmonə məbləği çanədə be barədə məlumat doə nişe.