Boku hokumət azadfikrinə şəhrvandon təğibi dəvom kardedə

Beynəlxalq Human Rights Watch təşkilat ıştə 2016- minə sori yekun hesabatədə Az.R-ədə bəşəri hüğuğon vəziyyəti qıvonin be ğeyd kardəşe. Avropa Şura Parlament Assambleya (AŞPA) Monitorinq Komitə həmməruzəçion Stefan Şennaç və Sezar Florin Preda Az.R hokuməti bəşəri hüğuğon riayət karde barədə bəştə ehdə peqətə müddəan çı cür əməl karde de omute məğsədi bə məmləkət omən, de İ

Əliyevi, MM, Sər Prokuratura, müxalif partiyon rəhbəriyyəti vindemonon kardəşone. Məğsəd Boku hokuməti bəştə şəhrvandon münasibətədə bə repressiya hərəkəton orəx doe dəvət kardeye. Əmo məmuron bə azadfikirinə odəmon təzyiğon ısətən dəvom kardedə.

Natəvonon Hüğuğon Müdafiə Komitə sədr Mirvari Ğəhrəmanli orəxnə vaxtonədə Kasipi dıyo natə estakadədə ğəzo, Sanqəçolədə ğazə lulə 3 kərə tıpe barədə bə ictimaiyyəti məlumat doe səbəbiku 10-12 ruje ki, bə təhdidon məruz mandedə. Ey bı barədə bə "Azadlıq radiosu" qəp jəşe. Votəşe ki, "mıku tələb kardedən ki, qəzon barədə xəbə nıdəm, Sokari tarif bıkəm".

Jurnalist-bloqqer Mehman Hüseynovən polisi dəstqir kardəşbe, şebədə çəvon tərəfo bə işqəncə məruz mandəbe. Ey ım fakton bə cəmiyyəti nəzə rosnişe. Dınyo 25 qılə hüğuğ müdafiə təşkilaton Hüseynovşon müdafiə karde, Boku hokumətiku tələb kardəşone ki, ım ğeyri- insoni hərəkəti qınokaron bə məsuliyyət cəlb bıko.

Daxili Koon Vəzarətən ıştə bicə xislətiku dast kəsə nişe. Bə Respublika Sər Prokuratura çe Mehman Hüseynovi barədə şıkayət kardəşe ki, quya əv bə polison şər ğandedə, polis şebədə bey işqəncə doəşon ni.