Divojə əhali zəminon çəvon dasto sedən
Divojə əhali quzərani təşkil karde əsasə mənbə zəmine. Az.R mustəğil bıə bəpeş, sovxozon zəmin bə əhali baxş kardışone, ki əvon de kaşteko məşğul bıe, di təsərrufati məhsulon perosnie roy boştə quzəroni lozim bıə maddi tələbaton bə dast varde bızınon. Əmo çand sorone ki, Respublika divojon bə keşvəri rəhbəriyyəti kardə şikayəton osanqedəni. Əvon çəvon zəminon dastokuşon se barədə çe devləri rəhbəriyyətiku imdod pidəşone.
Liki rayoni Rvarud diy sakinon de jıqo problemi əlağədar bə Prezidenti və Sər prokurori muraciətşon kardə. Çəvon ım muraciət həmən “Teref.az” sayti dərc kardəşe. Im şikayətiku məlum bedə ki, Rvarud diy zəminon xeli hissə bə hamsuə Anzolu və Tanqəbın diy zəminon aid kardəşone. Imən bey səbəb bıə ki, nəinki diy əhali i ğism ıştə baxşə zəminonku məhrum bıə, hətto Rvarud diy ğəbıstonən çe Anzolu diy ərazi hisob bedə. Rvarudojon çe devləti rəhbəriku ım məsələdə bəvon komək karde, çəvon dədə bobo zəminon bəvon oqordınie xahiş kardəşone.
Çe Qax rayoni Əmircan diy əji Elşən Mahmudlu zəminən “Uludağ” turizm kompleksi xıvand Zabit Əhmədovi zəbt kardəşe. Mahmudlu bo Meydan TV izah kardəşe ki, ısət Əhmədovi həmonə ərazi bəştə ğohomi nom ovoştıniəşe. Həmonə odəmən votedə ki, ey ım zəmin hıriəşe, bı həxədə dastədə sənədşən heste. Elşən Mahmudli bə rayoni və Respublika həmə orğanon şikayət kardəşe, əmo hiç qıley təşkilat bə çey dardi ənçom kəşedəni.
Meydan TV ço qıley fəğırə divoji zəminə problem bə cəmiyyəti nəzə rosniəşe. Ğəzax rayoni Canallı diy sakin Çinqiz Xəlilov 2014-minə soriku ıştə zəminə sahədə kaşteko barde zınedəni, çunki həmonə diy bələdiyyə sədr Babək Şahmaliyev çey zəmini ro bə co kəsi həvatəşe. Isət çe Xəliloviku 6 həzo mənot rışvə pidəşe ki, həmonə roy bə çey nom ovıştono ki, əv bəştə zəmin şe imkanədə bıbo. Ğəzax rayoni icra hakimiyyəti bə muxbiri parsi cəvobədə bey məsləhət zınəşe ki, bə Canallı diy bələdiyyə muraciət bıkardo. Bələdiyyə sədr Şahmaliyeviən bə muxbiri cəvob doeku imtina kardəşe.
İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.
