Az.R-ədə intiharon miğdar xeyli vey bıə

2017-minə sori 2 həftə müddətədə məmləkətədə 19 nəfəri intihar kardəşe. Bımi cəhd kardə 6 nəfəriən xilas karde mümkün bıə. Bı barədə "Nur-az.com" sayti xəbə doəşe. Im bədə xəbon çe respublika müxtəlif məntəğonku - Haciğabul, Cəlilabad, Hatəçolə, Şəki, Şəmkir, Ğuba, Qəncə, Biləcıvo, Zağatala rayononku omedə. Boku şəhərədə bı müddətədə 8 nəfəri bəştə ğəsd kardəşe.

Jıqo intihar hadison dınyo həmə məmləkətonədən vağeə bedə. Hətto Avropa bənə Finlandiya, Norveç və diqər  firəvonə keşvəronədən şəhrvandon arədə ım çürə hərəkəton mevcudin. "Maidə.az" sayt psixoloq Dəyanət Rzayevi və sosioloq Əhməd Qəşəmoğli fikron dərc kardəşe. Əvon votəşone ki, ıntihari səbəbon müxtəlif bedən. Azərbaycanədə çımi əsas səbəb maddi vəziyyəti, quzərani qıvonin beədey. İntiharon xeyli ğism kredit ğarzon oqordınie imkani nıbe səbəbiku bə əməl omedə. Hokumət bəpe çımon səbəbon omuto, bə mışğıl eğınə odəmon koməq karde ro tədbiron bıvindo.

Məlume ki, de har intihar hadisə əlağədar prokuratura cinayətə ko bino, çey səbəbon təhğiğ kardedə. Ponə sori hokuməti rəsmiyon məlumat doşone ki, hüğuğ mühafizə orğanon 9 manqədə  de  500 intihar hadisə əlağədar təhğiğat bardəşone. Əmo hokuməti ım intiharon səbəbi barədə hiç qıley məlumat nıdoşe.

Mənoti devalvasiya bəpeştə hokuməti bo Naxçıvani əhali jıqo qıley ğərar doşe ki, əvon ıştə kredit ğarzon de kanə , yəni 1 dollar - 1 mənot 5 kopiqi müğabilədə obəqordınen. Əmo ım ğərar bə Azərbaycani həmə əhali aid nıkardışe. Əve ısət mənoti məzənnə erjon be-be, çıvrey əhali kredit ğarzi miğdarən şe-şe vey bedə. Məvuji hejo bı səbəbən Naxçıvanədə əhali intihari miğdar çe Azərbaycanisən xeyli bə kame. Çimiən məntiği nəticə ıme ki, əhali intihari əsas səbəb hokuməti bardə nağisə daxili siyasətədey.