Az.R-ədə avtomobili istehsal şe-şe kam bedə.

Az.R-ədə avtomobil istehsali sənaye 2004-minə sori de Qəncə şəhərədə Avtomobilə Zavodi bə ko dəşe bino bıe.

2010-minə sori Naxçıvanədə “NazLifan” , çey bə peş Natəçolədə aztomobilə zavodon bə ko dəğandışone. Imsor Azərbaycani de Rusiya “Qaz” şirkəti muştərəkə muəssisə Haciğabulədə ıştə fəaliyyət bino kardəşe.

Azadlıq.İnfo sayti Respublikadə avtomobil istehsal kardə muəssisəon barədə qıley məğalə bə əhandon edaştəşe. Çə məğaləku oşko bedə ki, həmonə muəsisəon fəaliyyət sorbəsor tənəzzul kardedə, çimiən səbəb bə çəvon istehsal kardə avtomobilon tələbati kam beədəy. Devlətə Statistika Komitə məlumat doəşe ki, ımsori 7 manqədə keşvəri zavodon 940 qılə avtomobil istehsal kardəşone. Imən bə ponə sori muvafiğə manqon nisbətədə 134 ədəd kame. Umumən isə 2019-minə sori keşvərədə cəmi 2360 qılə, 2020-minə sori 1949 qılə, yəni 411 qılə kam sıbıkə avtomobil istehsal bıə.

Bə Meydan TV bardə tədğiğati əsasən orəxnə 15 sorədə inşa bıə zavodon əksəriyyəti ıştə fəaliyyət oqətəşone. Qəncə Avtomobilə Zavod, Şamaxı Televizorə Zavod, Şamaxi Avtomobilə Zavod, Minqəçevir Komputer və Elektronə Ovdonə Zavod, Naxçıvan Avtomobilə Zavod, Qəncə Aluminumə Zavod, İsmayıllı Velosipedə Zavod, Sumğayıt Karbamidə Zavod jəqo muəsisəon restədən.

Məmləkəti iğtisadiyyati çe karbohidrat hasilati jidastiətiku xilas karde , ğeyri-natə sahəon inkişaf kardovnie Əliyev hokuməti fəaliyyəti əsasə istiğamətono qıleye. Əmo zavodon tənəzzul nişon dodə ki, hokuməti ım siyasətən iflas bedə. Keşvəri iğtisadiyyati hartərəfin imkişaf kardovnie lozime. Bımi ro həmən çe əhali firəvonəti və çəvon xıridarəti ğodrəti ziyod karde lozime ki, çəvon məmləkəti şirkəton istehsal kardə məhsuli hırie ro pulşon bıbo. Bəvədə keşvəri iğtisadiyyatən hartərəfin inkişaf bəkarde, çe karbohidraton həvateku jidastiə vəziyyətoən de hosoni beşe bəzıne.

Bə Devlətə Statistika Komitə doə məlumaton əsasən ımsori iminə çətvərədə Umum Daxil Məhsul bə ponə sori muvafiğə manqon nisbətədə 1,3 ( 1 tam 10-də 3) faiz kam bıə. Rışvəxorə məmuron və monopolistə şirkəton ğarət kardə məzlumə xalği tələbat, həmən xıridarə ğodrət çı cur bıbo, məmləkəti UDM miğdarən bə çur bənine.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.