Niyaməddin Aslanzadə bə 5 sutkəninə inzibatiə zindonə cəzo məhkum kardəşonbe.

Çe “Xeberman.com” sayti redaktor jurnalist Polad Aslanovi bıyə Niyaməddin Aslanzadə bə 5 sutkəninə inzibatiə zindonə cəzo məhkum kardəşonbe.

Avğustə manqi 31-minə ruji çey zindonə muddət bə orəx rəsə və əv bəştə kə oqardə. Çey votəyono məlum bıə ki, əvşon bə Ombudsman Aparati şikayəti qorə dastqir kardəşonbən. Ey muddəti bə nav çe Poladi ənəhardə aksiya dəvunie həxədə çand kərə bə Ombudsman Aparati zanq kardəşebe, əvonış de çey tale məşğul nıbe qorə tənğid kardəşbe, bə  Aparati həmkaron irad qətəşbe ki, boçi ıştə vəzifə deni icra kardedənin. Bı səbəbən əvon bə polison şikat kardəşone ki, quya Niyaməddin Aslanzadə əvonış təhğir kardə. Niyaməddini bə Meydan TV votəşe ki, “Ombudsmen Aparati ıştə şikatədə hiç qıley fakt vardəş nıbe. Konkret de kom sıxani əvonım təhğir karde nişon doəşon nıbe, çunki az bəvon təhğiramiz hiç çi votəm nıbe. Bə səbəbən sıftə polison mınşon bə şebə sədo kardıe, azən izahat nıvıştıme, əvonən mınşon vadoe. Əmo 2-3 ruji bədiqə mınşon təkrar vanq karde, bardışone bə məhkəmə və əyo bo mı 5 sutkə məhbəsə cəzo bırişone”. Ey ımən əlavə votəşe ki, həmonə məhkəmə ğərorku apelyasiya şikayət bədo.

Jurnalist Polad Aslanov 2019-minə sori iyunə manqi 12-ku zindonədəy. Boku qonə cinayəton məhkəmə bo ey  bə vətəni xəyanət ittihami 16 sornə zindonə cəzo bıriəşe. Əv ıştəni taxsikar zınedəni, ım ittihami bıhton hisob kardedə. Çunki əv çe Devlətə Əmniyyətə Xidməti koəkon zəvvaron ziyarəti təşkil kardə şirkətonku bə har zəvvari qorə 10-20 dollar miğdarədə rışvə tələb karde barədə tənğidiə məğaləon nıvıştedəbe. Bə səbəbən əvon de şər və bıhtonə ittihami əvşon çe azadiku məhrum karde.

“Bemarzə Reportyoron” təşkilat və həniən co bəşəri huğuğon mudafiə onoemonon Polad Aslanov bənə siyasiə məhbusi zınəşone, Boku hokumət dəvət kardəşone ki, ey ozod bıkardo.

İbrimi Zahirəddin, çe Rusiya Yekaterinburğ şəhəriku, İİR sədo, tolışı radio.