Boku hokumət İslamə Həmrayəti sorədə bə dini cameə təzyiğon dəvom kardedə

2017-minə soriən Az.R hokumət bə dini cameon təzyiğ siyasəti dəvom kardedə. "İslamazeri.az" sayt xəbə dodə ki, Tojə Qunəşli məntəğədə bə "Xanıme Zəhra" məçiti koəkon çəşnavi kardəşone ki, məçiti ərazi çey dasto bəsen , və çey nomi əvəz bəkarden. "Sovetski" məhəllədə Hacı Cavad məçiti oçınie barədə sosial şəbəkoədə xəbon nəvedə. Polis nəfəron odəmon "Əhli Beyt" Hüseyniyyə məclisədə iştirak karde de muxtəlif vonon mane bedən.

Qəncə şəhəri rəsmiyon "İmomzodə" ocəği "İmom Hüseyn" meydon dəbastəşone, çəvrey de Latıni əlifba nıvıştə bıə plakat oçıniəşone. De ım məsəlon əlağədar sayti moxbiri bə Dini Təşkilaton dair Devlətə Komitə və bə Ğəfğaz Mısılmonon İdarə müraciət kardəşe. Əmo əvon hələ ki, bey bı barədə hiç qıley fikir votəşon ni.

Hokuməti bə dindarə şəxson monasebətədən təzyiğon dəvom hestışe. Ey Bulbulə ğəsəbədə nafkonə "İmam Xomeyni" məçiti axund Haci Məsim Novruzovu çe məmləkətiku bə xaric beşe ğədəğə noəşe. Haci Məsim dini məhbus Abqul Soleymanovi həsuəy. Çey zoə Ruhullah Novruzzadə Ğum şəhərədə ilahiyyatə təhsil sedə. Boku hokuməti  beyən bə respublika ome ğədəğən kardəşe. Bəhalinən Ruhullah xeyzon Bulbulədə jidə. Haci Məsim yanvari 23-ədə bə İron çey tono şe piəşe. Əmo Hostoro sərhədədə mərzvonon bey çe məmləkəto beşe icazə doəşon ni.

Az.R rəsmiyon bəştə mısılmonə şəhrvandon munasibətədə  ım cürə ğeyri-insani hərəkəton, həmən bə dini cameon kardə təzyiğon çəvon İslamə Həmrayəti həxədə votə sıxanon bə puç bekardedə. Oşko bedə ki, əvon ıştə antiislamə hərəkəton de eparçınie məğsədi, həmən dınyo ictimaiyyati nəzədə exroc nıbe ro ım şuari bə nav dodən.