Məhkəmə Taleh Bağırzadə bə 20 sornə zindonə cəzo məhkum kardışe

Yanvari 25-ədə Mısılmonon İbemonə Hərəkati sədr Taleh Bağırzadə və çey 17 nəfər həmməsləkon məhkəmə bə orəx rəse. Hakimi çəvon barədə hukm elan kardəşe.

Taleh Bağırzadə və Abbas Hüseynov bə 20 sor, Cabbar Cabbarov 19 sor, Rasim Cəbrayılov 17 sor, Zakir Mustafayev, Abbas Təğizadə, Abbas Ğuliyev, Adil İsmayilov, İbrahim Xudaverdiyev, Etibar İsmayilov, Bəhruz Əsqərov, Əli Nuriyev, Cahad Babakişizadə, Şamil Abduləliyev, Əlibalə Vəliyev və Fərhad Balayev bə 14 sor 6 manq, Ramin Yariyev və AXCP idarə heyəti üzv Fuad Ğəhrəmanli bə 10 sor müddətinə zindonə cəzo məhkum bıən. Məhbuson bə ım hukmi de daskə cəvob doəşone. Bağırzodə votəşe ki, zulminə məmləkəti hər vırə zindone. Vəkil Yalçin İmanov  apellyasiya sikayəti doe aqah kardəşe, ki ım məsələ bə Avropa Məhkəmə bekarde mumkun bıbo.

Huğuğ mudafiəəkə Leyla Yunusi ğeyd kardəşe ki, ım çe İlham Əliyevi vey yolə səhve. Isət qıley vaxt omə rəsə ki, məmləkəti həmə həxpərvər ğıvvon vəhdət nişon doənin ki, ım rejimi zulmi çe xalqi səpe rədd karde mumkun bıbo.

Yanvari 23 -ədə Revşən Məmmədli və Əhsən Nuruzadə nomədə 2 nəfər cıvon polisi tərəfo dəstqir kardə bıə. Polis əvoni bə "Nardarani hadisə" məhbuson tarifinə nıvıştəyon səbəbiku bə zindon dənoəşe. Im məlumat bə "Azadlıq.info" sayti Nardarani məhbuson nezə odəmon votəşone. Bə Məmmədli 30 sutkə zindonə cəzo elan kardəşone. Ce Nuruzadə həxədə tosə yanvari 27-i hiç qıley xəbə bıə ni. Çey odəmon, həmən vəkil Yalçin İmanovi bə DKV və  Nərimanov rayoni polis şebə  muraciət kardəşone, əmo çey tale barədə hiç qıley xəbə se mumkun bıə ni.