Nardarani hadisə məhbuson məhkum kardə ğərar bə ictimaiyyəti etirazi səbəb bıə

Mısılmonon İbemonə Hərəkati sədr Taleh Bağırzadə və çey həmməsləkon bə dırozmüddətinə zindonə cəzo məhkum karde bə ictimaiyyəti etirazi səbəb bıə. "İslamazəri" sayti de ım məsələ əlağədar çe Azərbaycani İslamə Partiya bəyanat dərc kardəşe. Əyo votə bedə ki, məhkəmə bo T.

Bağırzadə və diqər 17 nəfəri umumən  260 sornə həbs cəzo muəyyən karde beədalətin, ğeyri-obyektiv və ğeyri-adekvat qıley hərəkəte. "Milli Şura"n bı məzmunədə ıştə etirazə bəyanatədə de Nardarani hadisə əlağədar ım məhkəmə  Azərbaycani tarixədə ən rısvoninə ko hisob kardəşe, çunki, ey muttəhimon qıno subut nıbə vəziyyətədə bəvon ən beədalətinə və beysurə hukm bekardəşe.

Beynəlxalq "Human Rights Watch" bəşəri huğuğon mudafiə təşkilatiən bə ım koy ıştə munasibət bəyan kardəşe. Votəşe ki, məhkəmə bə məhbuson işqəncə fakton təhğiğ kardəşni, demiən hokuməti bəştə ehdə peqətə beynəlxalq təəhhudon darıştəşe. Bə qorə bə  ım 18 nəfər məhbuson cinayətə koon bəpe xitam doə, əvon bəpe azad kardə bıbon.

Ğəfğazədə Dini Etiğad və Vicdonə Azadi Mudafiə Mərkəziən Az.R -ədə bə dini fəalon hokuməti tərəfo mevcud təzyiğon məhkum kardə bəyanat doşe. Əyo ğeyd bedə ki, hokuməti Əhsən Nuruzadə dızdie, Revşən Məmmədli bə 30 sutkə muddəti dəstqir karde, sosial şəbəkə fəalonədə Seyyid Əbdul Xaliq Cəfəri və diqərion ki, ıştə nomi oj kardeku ehtiyot kardedən, təğib karde nişon dodə ki, əv bə dndarə əhali munasibətədə ıştə repressiya siyasəti dəvom kardedə.

"Nur.az.com" sayt xəbə dodə ki, Məştəğə sakin, sosial şəbəkoədə Taleh Bağırzadə fəal tərəfdadonədə qıley Təbriz Sibili polisi tərəfo dəstqir, və bə 30 sutkəninə cəzo məhkum kardə bıə.