Polisi dini fəal Əhməd Nəsibzadə dızdiəşe

Təğribən 2 həftə çimi bə nav, Respublika polisi bloqqer Mehman Huseynov dızdişe, bey işqəncə doşe. Əmo çoko ki, sosial şəbəkonədə ım məsələ dee bə Avropa səviyyə rosniə be, DKV ıştə ım cinayətə əməl inkar kardışe, votışe ki, polis orğanonədə bə şəhrvandon işqəncə doe qıley bıhtone, hətto bə Prokurori şikayətşən vığande. Im məzhəkə nəticən əv be ki, məhkəmə Mehman Huseynov 200 mənot cərimə kardışe ki, quya ey bə polisi şər ğandəşe.

Isət 1 həftey ki, dini fəal, Mısılmonon İbemonə Hərəkati uzv Əhsən Nuruzadəku hiç qıley xəbə ni. Çey vəkil Yalçin İmanovi bə Respublika həmə aidiyətinə orğanon muraciət vığandəşe, əmo tosə ısət çəvonku çe Nuruzadə tale barədə hiç qıley xəbə se mumkun bıə ni. Əhsən Nuruzadə moə Zeynəb Huseynova bə Mehriban Əliyeva muraciət vığandəşe, ki, "tınən moəş, ıştınən balə heste, 1 həfte çımı baləku hiç qıley xəbə ni,  xahiş kardəm çey tale həxədə bəmı qıley xəbə bıdə".

Huğuğ mudafiəkə Qğtay Quləliyevi "Azadlıq.info" saytədə nıvıştəşe ki, DKV bı bardə tosə ısət sukut karde, tosə ısət Əhsən Nuruzadə axtarışi təşkil nıkarde jıqo qımon bə əməl vardedə ki, hejo polisi əv ıştən dızdiəşe.

Sosial şəbəkonədə nıvıştedən ki, "Bandotdel"i əv dızdiəşe, qıvoninə işqəncə nəticədə ey ıştə huş qin kardəşe. DKV -ən çey barədə hələ ki, hiç qıley məlumat nıdoeən səbəb yəğin bımədey ki, çey bədənədə işqəncə rizon hestin. Əvon anədə məlumat ədənin ta ki, işqəncə rizon qin bıbo. Bəvədə yəğin ım vəzarəti rəsmiyon ijən bə Prokurotura şikat bəkan ki, bəs ictimai fəalon bə şərəfinə polison de şər ğande məşğulin. 

Iştə ğeyri-ğanuniə hərəkəton de saxtakarəti eparçınie, məqəvuji bo ım devləti məmuron bə adət peqardə.