Az.R Mudafiə vəzir Zakir Həsənovi bə İron səfər kardəşe

Çe İroni İslamə Respublika de Azərbaycanə Respublika miyono xoşməraminə munasibəton inkişaf kardedə. İroni Xarici Koon vəzir Nuseyn Əmir Allahiyan bı barədə ıştə votemonədə ğeyd kardəşe ki, ım dı qılə keşvəron munasibətonədə xeyli muhummə inkişafon cəş kardə bedə

Prezident İlham Əliyeviən yanvari 25-ədə de İroni Ro və Şəhərinşa vəzir Rustəm Ğasımi sərdarəti kardə numayəndə heyəti  videoformatədə vindemon dəvunişe. Im tədbirədə Əliyevi votışe ki, Ğərəboği muharibə orəxə bəpeş, reqionədə bo həmkarəti karde ro vərzinə imkanon bə miyon omən. İroni İslamə Respublikan bı koədə iştirak karde vey yolə əhəmiyyətış heste.

Həmonə ruji Boku hokuməti Mudafiə vəzir Zakir Həsənovi bə İron 2 rujnə rəsmiə səfər bino bıe. Ey Tehronədə de İroni Əsləhinə Ğıvvon Sər Ğərarqohi rəis Məhəmməd Bağeri didorış bıə. Sputnik Azərbaycan bə Az.R Mudafiə Vəzarəti doə məlumati istinadən xəbə doəşe ki, tərəfon ım didorədə mudafiə sahədə həmkarəti məsələon muzakirə kardəşone. Ruji bədiqə Həsənovi de İroni Mudafiə vəzir Məhəmmədrza Qərayi Aştiyani vindemonən dəvardə. Aştiyani bı tədbirədə dı qılə devləton əmniyyət və mudafiə sahədə həmkarəti zumand karde zəruriyyət ğeyd kardəşe, həmən votəşe ki, çəmə keşvəron qeosiyasi mevğe jıqo əlağəon inkişaf kardovnie ro hevujə potensialon bə əməl vardedə. Vındemonədə tərəfon mudafiə, hərbi-texniki, hərbi-tibb sahədə həmkarəti ovc kardovniə perspektivon, ekspert heyəton mıştərəkə səfəron təşkil, iyən kali co mevzuon ətrofədə muzakrəon bardəşone. Tədbiri orəxədə tərəfon didori nəticə barədə protokol ğəbul kardəşone.

İbrimi Zahirəddin. Çe Rusiya Yekaterinburğ şəhəriku, İİR sədo, tolışi radio.