AZAL bə milli fəlakət peqardə

AZAL aviaşirkəti bileton xeyli boho bıe həxədə, hətto çe devləti Parlamenti səviyyədə çanədə muzakirəon bıboən, ce ım şirkəti rəhbəriyyətiku çand kərə bileton ğıyməti bə hamsuə devləton muğayisə səviyyə eğande xahiş bıkonən, ım qəpon hiç qıley foydəş doəni

Isət Turkiyə de Ermənistoni ıştə həvo rabitə bərpo kardəşe. Ankaraku bə Yerevan bileti ğıymət maksimum 87 mənoti ğədərədəy, AZAL isə Bokuku bə Ankara sərnişinon bə 250 mənot bardedə. “Teref.az” sayti de “AZAL bə milli fəlakət peqardə” sərlohə bə ım problemi qıley məğalə həsr kardəşe. Məğalə muəllif sosialə şəbəkəonədə əhali jıqo vəziyyətiku çanədə norozi bıe ğeyd kardedə, nıvıştedə ki, AZAL-i prezident Cahangir Əsgərovi damə bıkoş de “Turkiyə çəmə bıvəy” şuari jıqo nalə bəkəşe ki, odəmon mu biz-biz bəbe. Əmo bə Ankara bileti ğıyməti 250 mənotiku saru eğandedəni. Ermənion isə bə Ankara de 3 ğat erjonə bileti pəredən.

Jıqo qıley ğeyri-normal vəziyyəti bə əməl ome əsasə səbəb AZAL-i məmləkəti aviasiya sərnişinkırniə sahə bəştə monopoliya ji dənoye. Kali mutəxəxison votedən ki, monopoliya keşvəri iğtisadiyyati  co sahəonədən mevcude. Jıqo istismarə vəziyyəti çe arə barde ro Parlament bəpe “Rəğabətə Məcəllə” ğanuni ğəbul bıkardo.

 “Sputnik Azərbaycan” bı barədə nıvıştedə ki, jıqo qıley təklif hələ 2008-minə sori Milli Məclisədə ros kardəşonbe. Əmo ım ğanun bə dıjdə şirkəton maraği zidd bıe səbəbiku həmonə təklifşon eparçınie. Parlamenti İğtisadi siyasət komitə sədr Tahir Mirkişili bə jurnaliston votəşe ki, Rəğabətə Məcəllə ğəbul karde ro bəpe munasib şərait onəy. Jıqo şərait nıbə vəziyyətədə həmonə ğanun ğəbil bıboən , çey hiç qıley effektış nibəbe. Maliyyə Vəzarəti de ictimaiyyəti əlağə şebə mudir Mais Piriyevi bə “Report” sayti votəşe ki, Maliyyə Vəzarət , həmən devləti co vəsiləon monopolizmi çe arə barde ro lozımi ğanunon ğəbul bıe vacib zınedən. Haliyədə çey ko kardə Vəzarəti icraatədə bı barədə hiç qıley sənəd mevcud ni.

Ğeyd bıkəmon ki, deputat Vahid Əhmədovi hələ ponə sori etiraf kardəşbe ki, Rəğabətə Məcəllə layihə bo məsləhəti ro bə İğtisadiyyat, Ədliyyə və Maliyyə Vəzarəton təğdim kardəşone. Əmo tosə ısət nəinki əvon bı layihə ıştə fikir votəşon ni, hətto ım məsələ bə Milli Məclisi ımsornə əvəsorə sessiya muzakirə plan daxil kardəşon ni.

İbrimi Zahirəddin, ce Rusiya Yekaterinburğ şəhəriku, İİR sədo, tolışi radio.