Boku hokumət marzon keynə oj bəkarde.

Məlume ki, de Kovid pandemiya əlağədar devləton arədə marzon ovaşteədə xeyli məhdudiyyəton tətbiğ kardəşonbe

Isət ım pandemiya şe-şe kam bedə, hokuməton həmonə məhdudiyyəton ləğv kardedən. Əmo Boku hokuməti hələ ki, bı barədə jı ğəror ğəbul kardəş ni. Hejo çimi nəticəy ki, Rusiya- Az.R marzi Dağıstoni əraziədə tosə 5 həzo nəfər azərbaycanıj marzi ovaşte bə çəşin. Rusiya hokuməti bo əvon Kaytağ rayonədə muvəğğətiə pənahqoh onoəşe, haliyədə əvrə pur bıə, 2 həzo 500 nəfər bə mehmonxonə dəğandəşone, 1 həzoən vey Məhərrəmkənd rayonədə bumiə sakinon tərəfo himayə peydo kardəşone. “Sputnik Azərbaycan” ım məlumati ğeyd kardə bə peş, həmən xəbə doəşe ki, marti 21-minə rujiku ım dı qılə devləton arədə zəminə marzon bəpe oj bıbon. Im xəbə dəğiğ karde ro sayti muxbiri bə Az.R Devlətə Kemruqə Komitə zanq jəşe, əmo əvon cəvob doəşone ki, bı barədə məlumat doe ro çəvon səlahiyyət nişone. Boku Vəziron Kabinetikuən ım məlumat təkzib kardəşone, votəşone ki, bəvonku jıqo məlumat ni.

 Nəvuzə idi ərəfədə Əliyev hokuməti bəştə şəhrıvandon ım ğədər sardonə munasibət nişon dodə. Rusiya de Az.R aviasiya rabitəən ğət bıe ım devlətədə jimon kardə 3 milyonisən vey azərbaycanıjə odəmon vəziyyəti qıvonin kardedə. Martə manqi 5-minə rujiku Rusiya Azərbaycani arədə avia rabitə muvağğəti oğətəşonbe. Peşo Rusiya tərəfi elan kardışe ki, deştə 8 qılə hamsuə devləton aviasiya xidməti bərpo kardedə, həmonə siyahiədə Az.R heste. Çand ruji bədiqə Rusiya “Aerofolt” aviaşirkəti bəyon kardişe ki, çe martə manqi 21-minə rujiku bə Az.R ıştə reyson bərpo bəkarde.

Martə manqi 15-də Milli Məclisi iclasədə Boku hokuməti Sər vəzir Əli Əsədovi bə bı həxədə doə parsi cəvobədə votışe ki, “ Karantinə ğaydəon həmul kardəmone, əmo pandemiya hələ çe arə beşəni, Rusiya hokuməti marti 21-ku həvo məkani sənibəton bo Azərbaycani oj kardəşe, Dağıstoni marzədə mandə həmmilləton məsələn çe hokuməti diğğətədəy, əmo bə çəvon aid ğəti ğəror hələ doə bıə ni” . Sər naziri ım cəvob “Sputnik Azərbaycani” bə cəmiyyəti nəzə rosnişe.

İyo AZAL nominə devlətə monopolistə avia şirkəti qıləy xislətiən bə nəzə varde bə vırə eqınidə. Martə manqi 5-ku elan bıe ki, bə Rusiya reyson dəparçidən. Çe navo bilet peğətə odəmon ki, ıştə bileti puli bə dumo se pidəşonbe, çəvon pulon onıqordışone, dələmurd kardışone. Isətən həmonə vəziyyət təkror bıe bəzıne. Diə məkəmon ki, Rusiya tərəfi bə Az.R həvo reyson bərpo kardəşe, və bileton həvatedə, Boku tərəfi bımi munasibət hələən ğeyri-muəyyəne. Jıqo vəziyyətədə “Tolışi sədo” radio muxbiri Moskva-Boku reysi vəziyyət omutəşe. Məlum bıə ki, de onlayn ğaydə bilet hırie mumkune, ğıymət çe 40 həzo rubliku bino bedə. Imən təğribən bə 600 mənoti bərobəre. Əmo məlum ni ki, qirəm Azərbaycani tərəf ım reyson ğəbul nıkardo, bəvədə biletsoybon ıştə puli bə dumo se bəzınen, ya ne?

Həmən Əliyev hokuməti tosə ısət Qərbi bə Rusiya elan kardə sanksiyon ıştə munasibət oşko votə nişe, bedəni zıne əv bə ım sanksiyon umjən qıniə, ya ne?

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.