Nardarani hadisə məhbus Nahid Ğəhrəmanovi məhkəmədə çiçon votışe
Fevralə manqi 3-minə ruji Boku Qonə Cinayəton Məhkəmədə Mısılmonon İbemonə Hərəkati sədri müavin Elçin Ğasımov və çey 11 nəfər həmməsləkon məhkəmə dəvom kardəşe.
Elçin Ğasımov 2015-minə sori noyabri 5 -ədə, yəni Nardarani faciəsə 21 ruj bə nav bə hicabi ğədəğə etiraz aksiyadə iştiraki qorə polisi dəstqir kardəşbe, məhkəmə bo eyo de bə polisi muğavimət vonə 30 sutkə zindonə cəzo bıriəşbe. Əv Nardarani hadisə vaxti zindonədə bıə. Im faciə bəpeştə bə çey əleyh de Cinayət Məcəllə 13 qılə maddə ittihamə ko bino kardəşone. Məhbus İsa İbrahimovən həmonə vaxt Kərbəlo ziyarətədə bıə. Çey pıə Tofiğ İbrahimovi bə "İslamazeri.az" sayti votəşe ki, İsa noyabri 19-ədə bə Kərbəlo ziyarət dəro qıniə, dekabri 17-ədə bə vətən oqardeədə Hostoro sərhəd məntəğədə dəstqir kardəşone. Lankoni İcra sərdar Ğəraşovi bə polisi təğdim kardə xosiyyətnamədə nıvıştedə ki, quya İsa İronədə dini təhsil səşe. Im due.
Məhbus Nahid Ğəhrəmanovi məhkəmədə votəşe ki, de hicabi ğədəğə əlağədar 100 həzo etiraz imza qırdə kardımone, bə prezidenti vığandımone, əmo çeyku cəvob nome. MƏV -ədə bəmı votedəbin ki, Binəğədiədə har manq 2 kilo nəşə havatedəbin. Şımə çiç kardəyone ki, ısət hiç nimə kiloən havate bedəni. Nardarani faciədə həlok bıə polison dindar be səbəbiku hokuməti ıştən əvonış kışte. Həmonə 2 nəfərədə - İsmayıl nominə polis faciəku bə nav bə Hacı Zülfiğar Mikayılzadə telefonədə votəşbe ki, "Hacı, çımı bə mominə odəmon həmlə karde curətım nibərəse". Ə polison nomoj əvotin, bə dindarə odəmon hurmət əken. Bə qorə polison əvonşonən şəhid karde.
Məhkəmə fevrali 10-də dəvom kardənine.
