Çe Ğəfğazi Mısılmonon İdarə sədri bə Səudiyyə Ərəbıston səfər

Ğəfğazi Mısılmonon İdarə sərdar Şeyx-ul-islam Allahşukur Paşazadə mayə manqi 10-minə ruji bə Səudiyyə Ərəbıston dəro qıniə. Çey səfər tosə mayə manqi 15 dəvom bəkarde

Çoşambə ruji Ər-Riyad şəhərədə “Dini tərəfdaron muştərəkə ərzeşon” nomədə beynəlxalğə konfrans ıştə koy bino bəkarde. Çe Şeyxulislamiən bı tədbirədə iştirak nəzərədə qətə bedə. Sıxan heste ki, əv ım səfəri çərçivədə de Ər-Riyad hokuməti dairon vəomə həcc ziyarəti şərton barədən molağat bəkarde.

Çe Mısılmonon İdarə sərdari, həmən Məkkə və Mədinə şəhəronədə omrə ziyarəti icra karde bə ım səfəri proqram daxile. Məlume ki, de pandemiya əlağədar bə Məkkə ziyarəti məhdudiyyəton noəşonbe. Dəvardə sori orəxədə bo Az.R şəhrıvandon omrə ziyarəti məhdudiyyət çe arə peqətışone. Bə 18 sinni rəsə har kəs ım ziyarəti icra karde bəzıne. Ərəbıstoni hokuməti hələ ponə sori bə omrə ziyarəti icazə  doədə elan kardışe ki, zəvvaron bəpe  hokuməti bəqəm kardə 4 qılə vaksini qıleyku peyvənd bıbon. Həmonə vaksinon Pfizer, Moderna, Johnson&Jonson, və AstraZeneca –y.  

Azərbaycani şəhrıvandon ki, de Sinovac vaksini 2 qılə doza peyvənd bıən, bəpe Pfizeri qıley dozan bəştə bıjənon. Kovidə noxəşiku mualicə bıe həxədə sertifikat etibarin hisob bedəni. Bə omrə ziyarət şe piəkəson bəpe bə Ğəfğazi Mısılmonon İdarə ıştə saleməti vəziyyəti həxədə tibbi arayış təğdim bıkardon. Zəvvaron həm ziyarətiku bə nav, həmən çey bə peş bəpe mutləğ kovidə testiku dəvardon.

Bə omrə ziyarət şə zəvvaron miğdari məhdud kardə limit nəzərədə qətə bıə ni. Im məlumat “Sputnik Azərbaycan” sayti rusi zıvonədə bə əhandon təğdim kardəşe.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.