Bə Tehron Ərdoğani səfər, Çavoş Oğlo iyən Əmirəbdullahiyani telefoniyə votımoni mehvər.
İron İslam Respublika xarıci vəzir, de Tırkiyə xarıci vəziri votımonədə, 2 qılə kişvəri konsul iyən siyasi mınosibəton və Tırkiyə prezident, bə Tehron Rəcəb Təyyeb Ərdoğani rəsmi səfəri mıvzo barədə de yande votımonışon kardeşone.
Bə İrna raporti əsos,zinə Tırkiyə xarıci vəzir, Mıvlod Çavoş Oğlo iyən İroni xarıci vəzir Husein Əmir Əbdullahiyan, Tırkiyə prezident iyən çəy aliyə heyəti nezə səfər bə Tehron ıştən rizoyəti elanışon kardən və 2tərəfiyə mahbubə mıvzoon barədə de yande votımonışon kardən.
Həminə telefoniyə votımonədə, həmçınin 2 qılə kişvəri kunsoli və siyasi mınosibəton iyən Tırkiyə prezident Rəcəb Təyyeb Ərdoğani rəsmi və 2tərəfiyə səfəri barədə de yande votımonışon kardən.
Tırkiyə prezident, Rəcəb Təyyeb Ərdoğan iyən siyasi və iğtisodi rəsmi şəxsonku aliyə heyəti bə ico bə İron İslam Respublika prezident Ayətullah Sed İbrahim Rəisi dəvəti əsos, dışəmbə ruj bə Tehron varid bəben.
Seşəmbə sıb, Tehroni Səedabadi torixi və mədəni məcmuədə, Tırkiyə pezidentiku rəsmiyə pişvazə mərosim bərpo bəbe.
De İron İslam Respublika prezidenti votımon, İron və Tırkiyə həmkari ali şura 7 minnə iclosi bərpo kardey və mətbuatiyə iclosi bərpo kardey, İroniku Ərduğani rəsmiyə vindemoni bərnoməonku bəbe.
