Rəisi: İron və Rusiyə həmkoətiro komilə plan hozzı bıə.

İron İslam Respublika prezident votışe: İron və Rusiyə həmkoətiro komilə planoni nəzər dəqətə bıə.

Bə İran Peres aqentiyəti raporti əsos, tojədən de daxıli iyən xarıci aqentiyətion nımoyəndəon xəbəiyə iclosədə, İron İslam Respublika Perezident Sed İbrahim Rəisi, İron və Rusiyə miyono rabitəon hevuj bey barədə votışe: de Rusiyə kişvər çəmə həmkoəti qıləy stratejikə həmkoətie və muxtəlifə baxşonədə bə inkişof rəse holədəy.

Rəisi ijən bəyonış karde: 2 qılə kişvəri prezidenton iclosədə bə həmkoətion dəvom iyən maneon peqətey dəvomi təkidış karde iyən votışe: ım həmkoətion dəvom peydo bəkay iyən 2 qılə kişvəri xarıci vəzarətxonəon miyono iminnə sıhbəton əncom bıə ki bəpe bə nəticə bırəsi.

İron İslam Respublika prezident ijən əlovəş karde: nat, qaz və enerji baxşədə investisiyaon əncom bey hələdəy ki çəvonku kali həm icra bıə.

Rəisi ijən bə İroni ələyh Amerkə sanksiyaon peqətey muzakirəonədə bə 4 qılə muhimmə amil işorəş karde iyən votışe: təvafuğədə çand qılə məsələ vey muhimmin, iminnə məsələ etemodinə qarantiya, 2minnə msələ sanksiyaon peqəteyədə əməli və oşkoə imtivon, 3minnə məsələ stabil iyən mıhkəm surətədə sanksiyaon peqətey və 4minnə məsələ nəzorəton və siyasiyə iddeaon orəx doe.