Boku iyən İrəvani miyono marzi daveon dəvom.

Zinə Erməniston iyən Azərbaycan Respublika mudafiə vəzarətxonəon co kərə yande bə otəşbast təvafuği darşiyə mıttəhəmışon kardə.

Bə Fars aqentiyəti raporti əsos ki Erməni Rədioku nəğl bıə, Ermənistoni mudafiə vəzarətxonə elanış kardə ki zinə şəv Azərbaycan Respublika silohinə ğıvvon de muxtəlifə silohon bə Erməni məntəğəon səmti qullə ğandışone.

Im daveon 2 qılə kişvəri şərğiyə marzi baxşədə əncom bıə ki bə Ermənistoni votəyon əsos, hiç tələfotış nıbe.

Azərbaycan Respublika mudafiə vəzarətxonə həm elanış kardə ki Yekşəmbə rujədə 19:35 tosə 21:50 bə məhəli zəmoni əsos, Ermənistoni silohinə ğıvvon de muxtəlifə silohon bə Azəri məntəğəon səmti qullə ğandəşe və çəy dumoədə Azərbaycan Respublika ərtış həm həminə hərəkəti əvəzədə, həmləoni əncomış doə.

2 qılə kişvəron tərəfo ım həmləon bois bıə Rusiyə vey rə reaksiya nışo bıdə.

Dışəmbə ruj Krımli sıxənəvot, Dimitri Peskov har 2 qılə tərəf yəni Boku iyən İrəvaniku tələbış kardə ki daveon əlovəkə hərəkəton vəy bıqəton.

Im hodisə zəmoni əncom bıə ki ğəror be Vaşenqtonədə bıə sulh muzakirəon barədə Ermənistoni xarıci vəzir Ararat Mirzoyan iyən Azərbaycan Respublika xarıci vəzir Ceyhon Bayramof miyono co qılə muzakirəon əncom bıbu və ım hosidəon çand saət həminə muzakirəon bənav əncom bıə.

Azərbaycan Respublika iyən Ermənistoni miyono oxonə sulhiro cəhdon qıləy holədə əncom bey holədəy ki 2 qılə kişvər ıştə hərbi baxşədə, zumandətion əlovə kardey dumoədən.

mediyaon xəbəşon do ki Miladi 2023 minnə sorədə Boku hərbi budcə əlovə peydoş kardə iyən nıvıştəşone ki Azərbaycan Respublika hərbi zumandətion əlovə kardey, çı dıvləti budcə xərcon vey muhimmə baxş heste.