Azərbaycan Respublika iyən Ermənistoni mıştərəkə marzədə hərbi daveon.

Azərbaycan Respublika, Erməni siloh bə dast qətə şəxson bə ım kişvəri marzbonon səmti qullə ğandey mıttəhəmış kardə.

De ım vucud ki Milodi 2020 minnə sori 44 rujə canq bə oxo rəsəşe iyən otəşbasti təvafuğnomə imzo bıə be, əmmo Azərbaycan Respublika iyən Ermənistoni miyono marzonədə hiç vaxt komil surətədə sulh icod nıbıə. Boku iyən İrəvan normal kardeyro kamissiyaoni icodışon kardə əmmo ım cəhdon həm marzi daveon və Boku iyən İrəvani miyono co qılə ixtilafaton vey rə əncom nıbıə.

Azərbaycan Respublika iyən Erməniston daimən yande bə otəşbasti darşiyə mıttəhəm kardedən. əmmo ım kərə Boku elanış kardə ki Azərbaycan Respublika sərzəminədə sakin bıə Erməni ğeyri ğanuniyə qrupon bə Azəri hərbiçion səmt qullə ğandəşe.

Bə Azərtac aqentiyəti raporti əsos, zinə cımə rujədə Azərbaycan Respublika de bəyoniyə vositə elanış karde: Ermənistoni sərzəminiku silohinə şəxson, marzi məntəğəonədə bə Azəri marzbonon qullə ğandışone.

Im bəyoniyədə omə: 16:05 dəğiğəku tosə 18 marzədə və de Erməni silohinə ğeyri ğanuniyə qrupon vositə dıvrıi surətədə, bə Azərbaycan Respublika hərbiçion mıvğiyəti səmt, qullə ğandə bıə.

Azərbaycan Respublika mudafiə vəzorətxonə ijən təsdiğış karde: Rusiyə sulh mərominə ğıvvon kontroli jintonədə ım həmlə əncom bıə.

Votey bəbe ki 44 minnə ruji canqi nəticədə ki Erməni və Azəri hərbiçion miyono əncom bıə Ğərəboğiku çand baxş Ermənistoniku co  iyən bə Azərbaycan Respublika dəçokney bıə.

Nəhayətədə Milodi 2020 minnə sorədəde, Rusiyə vositəçoiyəti iyən de təvafuğnoməon imzo kardey ki bə 3tərəfiyə bəyoniyəon məşhur bin Ğərəboği canq sə bıə iyən 2 qılə kişvəri miyono daveon məntəğədə Rusiyə sulh mərominə ğıvvon sakin bıən. ım qrup çand kərə bə Ermənistoni sərzəmini daxıl, Azəri hərbiçion bənav şey vəy qətəşon be.