Erməniston: Laçin bohrani peqəteyro, bəpe 20 nomo bıə qrup varid bıbu

Ermənistoni xarıci vəzir voteydə: bəpe 20 nomo bıə qrupi uzv bıə kişvəron, bə Azərbaycan Respublika ələyh, de təziği vositə Laçini koridori bohrani həl kon.

Laçin koridor vey yeqanə roye ki Ermənistoni bə bandiyə Ğərəboği mərkəz dəçokneydə. əmmo Dekabri 12 minnə rujədə, de Azərbaycan Respublika təbəonku qıləy qrupi vositə ki ıştəni ekolojist zıneydən, Laçin koridori ki bəvədə Rusiyə sulh mərominə ğıvvon sakinin, dəbastə bıə.

Boku iddioş kardə ki hədəf ım ni ki qıləy caddə dəbastə bıbu, və həmmə maşinon karde bəznen, har 2 qılə cəhətədə hərəkət kon, əmmo İrəvan ım hərəkət Boku səmtiku qıləy təhrikəkə hərəkət zıneydə ki Ğərəboği məntəğədə de qıləy insoni faciə icod kardey hədəfi əncom bıə.

Bə Tas aqentiyəti raporti əsos, cımə rujədə Ermənistoni xarıci vəzarətxonə mətbuatiyə təşkilot elanış karde: ım kişvəri xarıci vəzir, Ararat Mirzoyan votışe: Azərbaycan Respublika daimə huccumə hərəkəton iyən təhrikon, nışoş do ki cəvob boə mınosibə mexanizmon nıbey bois bəbe ki Boku ıştə əməlon vədə hərəkətiro, beynəlxalğə ictima irodə diyə nıko.

Ermənistoni xarıci vəzarətxonə mətbuatiyə təşkiloti bəyoniyə bə Mirzoyan nəğli tərəfo ijən omə: holihazırədə, İrəvani beynəlxalğə şərikon, əcumlə 20 nomo bıə qrupi uzvon, lozime bə Boku ğoymə təziğon varid ko ta Ğərəboği milləti ğeyri insoniyə mıhosirə sə bıbu, və Azərbaycan Respublika bə muzakirə miz obəqardon.

Ermənistoni xarıci vəzir ijən təkidış karde ki İrəvan lozim zıneydə ki qıləy beynəlxalğə həğiğəti peydo kardə heyət bə Ğərəboğ iyən Laçin koridor varid bıbu ta bəşərdustanə vəziyəti təğib ko və be mande bə bandiyə ğərəboği dast peydo kardey təzmin ko.