Tırkiyə partiya rəsmi şəxs: İroni İslomiyə İnğilob, həmmə dınyoədə islomi oğoəti boydəğe
Tırkiyə səadət qrupi muavin, İroni İslomiyə İnğilob həmmə dınyoədə İslomi oğoəti boydəğe.
Milodi 1979 minnə sori Fevrali 11 minnə rujədə, İroni İslomiyə İnğilob de Həzrəte İmom Xomeyni(r) rəhbəriyəti bə səbarzəti rəsə.
Tırkiyə Səadət nomo bıə partiya muavin Həsən Bitmez de Tele-Rədio aqentiyəti votımonədə, dınyoədə bə İslomiyə İnğilobi təsir işorəş karde iyən votışe: de diğğət bə zəmon iyən coqrafiya şəroyet, İslom iyən həmmə dınyoro, 20 minnə ğəİroni vey muhimmə hodisəonku qıləyni, İroni İslomiyə İnğilob bə hisob omeydə, və həğiğətədə İroni inğilob İslomi oğoəti boydəğdore, boçiki həmonə zəmonədə, vey islomi kişvəron istibdodi jintonədə bin və emperyalizmiro nokəti kardedə bin.
Həsən Bitmez ijən bəyonış karde ki islomi umməti oğoətiro İroni İslomiyə İnğilob binoəkə be, əv ijən əlovəş karde: İroni İslomiyə İnğilob, həmonə inğilob be ki bə milləti xıdmət rosniyero ıştə həmmə zumandətion bə ko qətəşe və Tırkiyədə həm bənə co qılə islomi kişvəron xususi cıvonon miyonədə, islomi oğoəti bois bıə.
Tırkiyə Səadət partiya muavin ijən təsdiğış karde: Tırkiyə milləti muxtəlifə qrupon İroni təhəvulaton bənə hamsuyə, dust və bıvə kişvər təğib kardedən və bə İroni məsələon vey meylışone ki de İroni İslomiyə İnğilob çəvon ım meyl vey əlovə bıə.
Bitmez ijən bə İroni İslomiyə İnğilobi bə milləti əsos bey təkidış karde iyən votışe: İroni İslomiyə İnğilob bə milləti himoyə əsose, və çəy iminnə koon bə millət xıdmət rosniye və nizomi idorə kardeyro məşvərəti metodi əncom doey holədəy.
Tırkiyə həminə partiya rəsmi şəxs ijən bə İroni İslomiyə İnğilobi anti emperyalizi iyən anti sionisti metodon işorə iyən əlovəş karde: inğilobi əvvəliku estemori kişvəron və sionist rejim, inğilobi zəif iyən məhv kardeyro, həmmə koon əncom dodən, əmmo de həmmə ım təziğon və sanksiyaon vucudi diyə kardəmon ki İron həmçınan muğavimət kardə və ğoyme.
Həsən Bitmez de emperyalizm və sionist rejimi vədə muğavimət və istadeqi kardey, İroni vey muhimmə xusiyətonku elan iyən əlovəş karde: İroni diğğət bə Ğuds iyən Fələstini məsələ vey bə təğdri loyğe.
Tırkiyə Səadət partiya muavin ijən təsdiğış karde: İroni İslomiyə İnğilobi həminə muğavimət bois bıə ki muxtəlifə baxşonədə, İron bə çəşəçi muvəffəğiyəton bırəsə iyən co kəsonro bə ulqo iyən simvol əvəz bıbu.
