Rusiyə və Tacikistoni mıştərəkə hərbi manevr bino be
Əfğanıstoni marzi nezədə Rusiyə və Tacikistoni mıştərəkə manevr bino bıə.
De ım vucud ki Taleban Əfğanıstoni sərzəminiku bə hamsuyə kişvəron təhdidi vəy qətey təkidış heste, əmmo kali ım kişvəron ım təhdidiku niqəronin, çand vaxt çımiku bənav həm Taleban tojədən elanış kardə be ki icozə nibədoy ki hiç qılə kişvər Əfğanıstoni sərzəminiku təhdid bıbu.
Dəvardə haftə Talebani xısənəvot, Zəbihullah Mucahid Hındostani Noyə Dehliədə bıə Şanxay həmkoəti təşkiloti uzvon iclosədə, kali kişvəron milli əmniyyət mışoviron niqəronəti reaksiyaədə ijən çı Talebani vəədə tikro və təkidış kardə: Əfğanıstoni sərzəminiku bə hiç qılə kişvəri ələyh istifodə nibəbe və kişvəron bəpe ım mevzu barədə niqəron məbun, əmmo bə nəzə rəseydə ki ım vəədəon çı Əfğanıstoni hamsuyəon nıqəroni miyoniku bardəş ni.
Bə Təsnim aqentiyəti Raporti əsos, Seşəmbə rujədə Rusiyə hərbion mətbuati təşkilot raportış do: Tacikistonədə və Əfğanıstoni marzi nezi 20 kilometrə məntəğonədə “meydoni hərb” nomo bıə təlim manevrədə, Rusiyə və Tacikistoni hərbi ğıvvon mıştərəkə manevri binşon kardə ki ım manevr Aprelə manqi 5 tosə 7 ruj dəvomış heste.
Im raportədə omə: həminə hərbi təmrinədə, Rusiyə və Tacikistoni hərbi ğıvvon bandiyə məntəğəonədə de mıştərəkə əməliyoti icro kardey və ğeyri ğanuni silohinə qrupon məhv kardey vositə, ım manevrədə məşğ kardışone.
Rusiyə ərtışiku 300 qılə hərbi de muxtəlif təchizoton həminə hərbi manevrədə iştirok kardəşone.
