Bə Tehron-Moskva həmkoətion, İroni kəştivonəti nəzə

İron İslom Respublika kəştivonəti qrupi mudir votışe: ım məcmuə, İron və Rusiyə torixi-ticori rabitəon inkişofi cəhətədə de stratejikə bərnomə və diyə qam peqəto.

İron və Rusiyə 2tərəfi zəminəonədə xususi iğtisodi, hərbi və əmniyyəti və həmçınin məntəğə və beynəlxalğə məsələon barədə de Amerkə unilateralizmi muğabilə kardey stratejikə mıştərəkə mənafe soybin və dəvardə soronədə ım məsələ 2tərəfə nezə vey muhimmə həmkoətion amilonku be.

Bə İrna raporti əsos, Rusiyə himoyə xıdməton və nəğliyoti 27 minnə beynəlxalğə nımoyeşqoh iminnə rujədə, İroni kəştivonəti qrupi mudir Muhəmməd Rıza Mudərres Xiyabani təsdiğış kardə: 13 minnə dıvləti siyasəton cəhətədə və İron və Rusiyə ticori torixi rabitəon inkişofi əhəmiyyəti çərçivədə, İroni kəştivonəti qrup, nığılə planon əncom doşe və əlovə bə şimol-cənub koridori icod kardey, Kaspi baxşədə dıyo ğıvvə inkişof de ciddi surət təğib bəbe.

Mudərres Xiyabani Rusiyə Salyankay təchiz və obod kardey de 10 milyon dollar sərmoyə noey və İslomi Respublika kəştivonəti qrupi hidoyət əcumlə şimol-cənub koridori inkişofi vey muhimmə koonin.

İron İslom Respublika kəştivonəti qrupi mudir, Rusiyə kişvəri bənə İroni torixi şərik və hamsuyə zınəşe və əlovəş kardə: ım kişvəri yolə vıjor, İroni taciron və istehsoləkəyon fəaliyətiro vey mınosibe və kəştivonəti qrup hozzoe ki dəvardəku vey ım zəminəon əməli bıko.

Zinə Moskvaədə, Rusiyə təchizaton və texnoloqiyaon beynəlxalğə 27 minnə nımoyeşqoh de Trans Raşa unvani ıştə ko binoş kardə və 3 ruj dəvomışe.