Erməniston və Azərbaycan Respublika miyono otəş basti darşiye

Azərbaycan Respublika iyən Ermənistoni Respublika 2 qılə hamsuyə kişvəron miyono daveon dəvomədə, zinə seşəmbə ruj, Rusiyə sulh mərominə ğıvvon, həminə 2 qılə kişvəron miyoo marziyə məntəğədə otəş basti darşiyeku xəbə doşone.

Milodi 2020 minnə sorədə Ğərəboği məntəğədə Erməniston və Azərbaycan Respublika 44 rujə canqi bəpeşt, 2 qılə kişvər de Rusiyə vositəçiyəti otəşbasti təvafuği imzoşon kardə. de otəşbasti təvafuğnomə imzo bey vucudi, həmçınan bə 2 qılə kişvəri rabitəon daveon bərğərore və 2 tərəf çand kərə yande bə otəşbasti daşiye mıttəhəmışon kardə.

Bə Fars aqentiyəti raporti əsos, Rusiyə mudafiə vəzarətxonə qıləy bəyoniyədə elanış kardə ki Asekron məntəğədə Laçin-Nəxcəvan roy məntəğədə 2 qılə otəşbasti darşiye ğeyd bıə.

Rusiyə mudafiə vəzarətxonə elanış kardə ki ım hodisə coni zərər-ziyonon şomil nıbe.

Im bəyoniyədə omə: Rusiyə sulh mərominə ğıvvon komandir de Azərbaycan Respublika və Ermənistoni bə ico, ım mevzu təğib kardey holədən.

qıləy holədə ki Seşəmbə rujədə Ermənistoni iminnə vəzir, ım kişvəri parlamentədə ıştə nıtğədə ım kişvəri ərtışi zumandəti və bə nakonə təvafuğon əsos, Azərbaycan Respublika marzon zıneyro cəhdoku sıxən votışe.

Azərbaycan Respublika prezident, İlham Əliyev həm de ım kişvəri devləti şəbəkə votımonədə votışe: Milodi 2020 minnə soriku(Ğərəboği 2minnə canq), ərtış vey zumand bıə.