Erməniston və Azərbaycan Respublika xarıci vəziron vindemoniro plan kəşey

Azəri və Erməni hərbiçion miyono marzi daveon əlovə bey cərəyonədə, Ermənistoni diplomatiya təşkilot xəbəş do ki ım kişvəri xarıci vəzir de Azəri xarıci vəzir vindemoniro plan kəşey holədən.

Tojədən Azərbaycan Respublika iyən Ermənistoni mıştərəkə marz, 2 qılə kişvəri marzi hərbiçion dave be.

Erməniston xəbəş do ki dəvardə rujon Azərbaycan Respublika həmləonədə, Stok marzi məntəğədə 6 nəfər Erməni hərbiçi zəxmin bin. Azərbaycan Respublika həm elanış kardə, tojədən daveonədə, qıləy Azəri hərbiçi kıştə bıə. əmmo İrəvan, həminə Boku iddeo du zınəşe. Daveon cərəyonədə qıləy Erməni rəsmi şəxs, Rusiyədə, Azərbaycan Respublika və Ermənistoni xarıci vəziron vəoməy haftə vindemoniku xəbəş do.

Bə Fars aqentiyəti raporti əsos, Cımə rujədə, Ermənistoni xarıci vəziri muavin Parober Hovanisiyan votışe: Mayə manqi 19 minnə ruji cımə rujədə, Moskvaədə, Azərbaycan Respublika iyən Ermənistoni xarıci vəziron Ceyhon Bayramev və Ararat Mirzoyan de yande vindemon bəkan.

Mayə manqi 4 minnə rujədə Vaşenqtonədə, 2 qılə kişvəri ali diplomatiya deyande vindemon və votımon kardəşon be.

Həmçınin Mayə manqi 14 minnə rujədə, Brusselədə Ermənistoni iminnə vəzir Nikol Paşiniyan və Azərbaycan Respublika prezident İlham Əliyev vindemon bəkan.

Ğeyd kardənine ki zinə Erməniston elanış kardə Azərbaycan Respublika de dronon vositə, Erməni hərbiçion bombaron kardışone.