Moskva, İrəvan və Boku 3tərəfiyə iclosi bərpo beyro Ermənistoni himoyə

Ermənistoni iminnə vəzir, Nikol Paşiniyan Mayə manqi 25 minnə rujədə de Veladimer Putin vositəçiyəti qıləy 3tərəfiyə iclosi bərpo beyro Moskva təklifiku ıştə himoyə elanış kardə.

Tosə ısət 2 qılə hamsuyə kişvər yəni Erməniston və Azərbaycan Respublika deyande 2 qılə xuniyə daveşon be ki Ğərəboği iminnə və 2minnə canqonədə, moli və coni hevujə zərəl-ziyon bə yande varid kardışone.

De Rusiyə və kali co kişvəron vositəçiyəti 2 qılə kişvəri hərbiçion miyono otəşbasti vucud, Boku və İrəvan yande bə otəşbasti darşiyə məhkum və mıttəhəm kardedən.

Bə İran Pres aqentiyəti raporti əsos ki İranku nəğlış kardə, de Azərbaycan Respublika sulh muzakirəro Rusiyə təklifi Ermənistoni muvafiğət qıləy holədə əncom bıə ki çımiku bənav Rusiyə xarıci vəzorətxonə sıxənəvot, Mariya Zaxarova 2 qılə kişvəri rəsmi şəxsonku tələb kardəş be ki dave iyən təhrikomizə hərəkəton əncom doeyku vəy bıqəto.

Zaxarova ijən oxonə rujonədə 2tərəfi səmtiku bə otəşbasti darşiye işorəş kardə və votışe: ısətnə zəmonədəde məntəğə vəziyəti stabiləti bəpe 2 qılə kişvər təhrikomizə hərəkəton əncom mədən.

Rusiyə xarıci vəzorətxonə sıxənəvot ijən əlovəş kardə: ım Rusiyə nəzəe ki bəpe siyosi və diplomatiya royku həmmə ixtilofon həm bıbu.